Англия Премьер-лигасининг 28-тури доирасида "Вест Хэм"га қарши ўйиндаги ғалаба (1:0), Жозе Моуриньога навбатдаги рекорд натижани тақдим қилди.

Ушбу ўйиндан сўнг португалиялик мутахассиснинг АПЛдаги "қуруқ" баҳслари сони 100тага етди. Бунинг учун Моуриньога 185та ўйин керак бўлди. Бу АПЛ тарихидаги энг яхши натижадир.

Бунгача рекорд афсонавий Алекс Фергюсонга тегишли эди. Шотланд мутахассиси "МЮ" билан бундай натижага 214та ўйинда эришганди.

Шунингдек, Моуриньонинг "Челси"си ўйинларнинг 54 фоизида ўз дарвозасидан гол ўтказиб юбормаган. Бу кўрсаткич бўйича ҳам Жозе етакчилик қилмоқда. Бундан ташқари, португалиялик мутахассис қўл остидаги "Челси" кам гол ўтказиши билан ажралиб турибди. Лондонликлар битта ўйинда ўртача 0,63та (ҳар 3та ўйинда 2та) гол ўтказиб юборишмоқда. Мазкур иккита кўрсаткич бўйича кейинги ўринларни "Ливерпуль" ва "Челси"нинг собиқ бош мураббийи Рафаэль Бенитес эгаллаб турибди — 45% ва 0,82та гол.