Реал Мадрид

Ташкил топиши

"Реал Мадрид" тарихининг илдизлари XIX аср охири ва XX аср бошларида Мадридда футбол оммалаша бошлаган даврга бориб тақалади. Хулиан Паласиос 1900 йилда Madrid Football Club атрофида футболчиларни бирлаштирган дастлабки шахслардан бири бўлган. Аммо клубнинг расмий ташкил топган санаси 1902 йил 6 март ҳисобланади. Айнан шу куни Хуан Падрос раҳбарлигида Madrid Foot Ball Club'нинг биринчи расмий директорлар кенгаши шакллантирилган.

1920 йил 29 июнда Испания қироли Альфонсо XIII клубга "Real" — "Қироллик" унвонидан фойдаланиш ҳуқуқини берди. Шу тариқа Madrid Football Club номи Real Madrid Football Club кўринишига келди ва клуб эмблемасига қироллик тожи қўшилди.

"Мадрид" илк йиллариданоқ Испания футболида етакчи кучлардан бирига айланди. 1903 йилда жамоа Испания кубоги финалига чиқди. Илк миллий соврин эса 1905 йилда қўлга киритилди. Кейин мадридликлар 1905, 1906, 1907 ва 1908 йилларда кетма-кет тўрт марта Испания кубогини қўлга киритишди.

Испания миллий чемпионати — Ла Лига 1928/29 йилги мавсумда ташкил этилди. "Реал Мадрид" ўзининг илк чемпионлигини 1931/32 йилги мавсумда қўлга киритди. Қизиғи, мадридликлар ўша чемпионатни бирорта ҳам мағлубиятсиз якунлашган.

Европани забт этган буюк давр

1950-йиллар "Реал Мадрид" тарихида янги даврни бошлаб берди. Сантьяго Бернабеу президентлиги остида клуб нафақат Испания, балки бутун Европа футболидаги энг кучли жамоага айланди.

Европа чемпионлар кубогининг биринчи мавсуми 1955/56 йилларда ўтказилди. "Реал Мадрид" Париждаги финалда "Реймс"ни 4:3 ҳисобида мағлуб этиб, мусобақанинг илк ғолибига айланди. Шундан сўнг мадридликлар тарихда бошқа ҳеч бир клуб такрорлай олмаган натижани қайд этиб, Европа чемпионлар кубогини кетма-кет беш марта — 1956, 1957, 1958, 1959 ва 1960 йилларда қўлга киритишди.

Бу афсонавий жамоада Альфредо Ди Стефано, Ференц Пушкаш, Раймон Копа, Франсиско Хенто, Хосе Сантамария ва бошқа юлдузлар тўп тепишган.

Айниқса, Ди Стефано "Реал Мадрид"нинг жаҳон футболидаги нуфузини оширишда ҳал қилувчи роль ўйнади. Хенто эса кейинчалик клубнинг олтинчи Европа кубогини ҳам қўлга киритиб, узоқ йиллар давомида 6 марта Европа чемпионлар кубогини ютган ягона футболчи бўлиб қолди.

1966 йилда "Реал" асосан испаниялик футболчилардан ташкил топган машҳур "Yé-yé" авлоди билан "Партизан"ни 2:1 ҳисобида мағлуб этиб, олтинчи Европа кубогини қўлга киритди. Жамоа сардори Франсиско Хенто эди.

"La Quinta del Buitre" даври

1980-йилларда "Реал Мадрид" академиясидан яна бир буюк авлод етишиб чиқди. Бу авлод "La Quinta del Buitre" номи билан футбол тарихига кирди.

Унинг асосий вакиллари:

Эмилио Бутрагеньо; Мичел; Маноло Санчис; Мартин Васкес; Мигель Пардеса.

Уларга мексикалик машҳур тўпурар Уго Санчес ҳам қўшилди.

"Реал" 1984/85 ва 1985/86 йилги мавсумларда кетма-кет икки марта УЕФА кубогини, 1985/86 йилдан 1989/90 йилгача эса кетма-кет беш марта Испания чемпионлигини қўлга киритди.

Бу авлод Европа чемпионлар кубогини юта олмаган бўлса-да, "Сантьяго Бернабеу"даги машҳур камбэклар ва жанговор футбол билан клуб тарихида алоҳида ўрин эгаллади.

90-йиллар ва Европага қайтиш

1990-йилларнинг иккинчи ярми "Реал Мадрид" учун Европадаги узоқ кутилган муваффақиятларни қайтарди.

1996 йилда Фабио Капелло бош мураббий бўлди. Роберто Карлос, Кларенс Зеедорф, Предраг Миятович ва Давор Шукер каби футболчилар жамоага қўшилди. Рауль, Фернандо Йерро ва Фернандо Редондо каби юлдузлар билан бирга бу таркиб 1996/97 йилги Испания чемпионлигини қўлга киритди.

Аммо клубнинг еттинчи Европа кубогини Капелло эмас, Юпп Хайнкес олиб келган. 1998 йил 20 май куни Амстердамда ўтказилган финалда "Реал" "Ювентус"ни Предраг Миятовичнинг ягона голи эвазига 1:0 ҳисобида мағлуб этди. Бу мадридликларнинг Европа кубогидаги 32 йиллик танаффусига барҳам берди.

1999 йилда жамоа Висенте дель Боскега ишониб топширилди. Унинг бошқарувида "Реал" 2000 йилда "Валенсия"ни 3:0 ҳисобида енгиб, саккизинчи Европа кубогини, 2002 йилда эса "Байер"ни 2:1 ҳисобида мағлуб этиб, тўққизинчи Европа кубогини қўлга киритди.

"Галактикос" даври

2000 йилда Флорентино Перес илк марта "Реал Мадрид" президенти этиб сайланди. Унинг асосий ғояларидан бири дунёнинг энг машҳур футболчиларини Мадридда жамлаш эди.

Луиш Фигу "Барселона"дан олиб келинди. Кейинчалик Зинедин Зидан, Роналдо Назарио, Дэвид Бекхэм ва Майкл Оуэн каби юлдузлар жамоага қўшилди. Шу сабаб бу таркиб футбол оламида "Галактикос" номини олди.

Висенте дель Боске бошқарувида жамоа 2001 ва 2003 йилларда Испания чемпиони бўлди, 2002 йилда эса Чемпионлар лигасини қўлга киритди. Зиданнинг "Байер"га қарши финалда урган машҳур голи футбол тарихининг энг чиройли голларидан бирига айланди.

Флорентино Перес 2006 йилда президентликдан кетди. Ўша йили Рамон Кальдерон клуб раҳбари бўлди. Унинг даврида Рууд ван Нистелрой, Фабио Каннаваро, Гонсало Игуаин, Пепе, Уэсли Снейдер каби футболчилар жамоага келди.

"Реал" 2006/07 ва 2007/08 йилги мавсумларда кетма-кет икки марта Испания чемпиони бўлди.

2009 йилда Кальдерон лавозимини тарк этди ва Флорентино Перес яна президентликка қайтди.

Криштиану Роналду ва янги "Реал"

2009 йил ёзида "Реал Мадрид" трансфер бозорида катта инқилоб қилди. Криштиану Роналду "Манчестер Юнайтед"дан ўша давр учун жаҳон рекорди ҳисобланган маблағга сотиб олинди. Шунингдек, Кака, Карим Бензема, Хаби Алонсо ва Альваро Арбелоа каби футболчилар жамоага қўшилди.

Мануэль Пеллегрини бир мавсумдан кейин истеъфога чиқарилиб, 2010 йилда Жозе Моуриньо бош мураббий бўлди.

Португалиялик мутахассис "Реал" билан 2011 йилда Испания кубогини, 2011/12 йилги мавсумда 100 очко билан Ла Лигани, 2012 йилда Испания Суперкубогини қўлга киритди. Аммо у Чемпионлар лигасида ғолиб бўла олмади.

Анчелотти ва "Ла Десима"

2013 йилда Карло Анчелотти "Реал Мадрид" бош мураббийига айланди.

2014 йил 24 май куни Лиссабонда "Атлетико"га қарши ўтган тарихий финалда Серхио Рамос 93-дақиқада ҳисобни тенглаштирди. Қўшимча вақтда Гарет Бэйл, Марсело ва Криштиану Роналдунинг голлари "Реал"га 4:1 ҳисобидаги ғалабани келтирди.

Шу тариқа клуб 12 йиллик интизорликдан кейин ўнинчи Европа кубоги — "Ла Десима"ни қўлга киритди.

Анчелотти 2015 йилда клубни тарк этди. Унинг ўрнига Рафа Бенитес келди, аммо испаниялик мутахассиснинг фаолияти узоққа чўзилмади.

Зидан ва тарихий учлик

2016 йил январда Зинедин Зидан биринчи жамоа бош мураббийига айланди.

Унинг даври "Реал Мадрид" тарихидаги энг буюк даврлардан бирига айланди. Жамоа:

2016 йил — 11-Европа кубоги; 2017 йил — 12-Европа кубоги; 2018 йил — 13-Европа кубогини

қўлга киритди.

Шу тариқа "Реал Мадрид" Чемпионлар лигасининг замонавий тарихида кетма-кет уч марта мусобақа ғолиби бўлган биринчи клуб бўлди.

Зидан 2018 йилда кетди. Хулен Лопетеги ва Сантьяго Солари даврларидан кейин француз мутахассиси 2019 йилда яна Мадридга қайтди. Иккинчи даврида у 2019/20 йилги Ла Лига ва Испания Суперкубогини қўлга киритди ва 2021 йилда клубни тарк этди.

Анчелоттининг иккинчи даври: 14 ва 15-Европа кубоклари

2021 йилда Карло Анчелотти "Реал Мадрид"га қайтди.

2021/22 йилги мавсумда жамоа Чемпионлар лигасида ПСЖ, "Челси" ва "Манчестер Сити"га қарши афсонавий камбэкларни амалга оширди. Париждаги финалда Винисиус Жуниорнинг голи "Ливерпуль" устидан 1:0 ҳисобидаги ғалабани таъминлади ва клуб 14-Европа кубогини қўлга киритди.

2023/24 йилги мавсумда "Реал" яна Европа тахтига чиқди. Лондондаги "Уэмбли" стадионида "Боруссия Дортмунд" 2:0 ҳисобида мағлуб этилди. Дани Карвахаль ва Винисиус Жуниор гол урди. Бу клубнинг 15-Европа чемпионлар кубоги бўлди.

Анчелотти 2025 йил май ойида клуб билан хайрлашди. Икки даврини ҳисобга олганда италиялик мутахассис "Реал Мадрид" билан 15 та соврин, жумладан 3 та Чемпионлар лигасини қўлга киритди.

2025–2026 йиллар: мураббийлар алмашинуви

2025 йил 1 июндан Хаби Алонсо "Реал Мадрид" бош мураббийи сифатида иш бошлади. Дастлаб у билан 2028 йилгача шартнома тузилган эди. Бироқ 2026 йил 12 январда клуб ва Алонсо ўзаро келишув асосида ҳамкорликни тўхтатди.

Ўша куни "Кастилья" устози ва клубнинг собиқ футболчиси Альваро Арбелоа биринчи жамоа бош мураббийига айланди. У 2025/26 йилги мавсум охиригача жамоани бошқарди ва 2026 йил 9 июнда лавозимини тарк этди.

Жозе Моуриньонинг қайтиши

2026 йил 11 июнда "Реал Мадрид" Жозе Моуриньони бош мураббий этиб тайинлаганини расман эълон қилди.

Португалиялик мутахассис шу тариқа 2010–2013 йиллардаги биринчи давридан кейин Мадридга қайтди. Унинг янги шартномаси 2029 йил 30 июнгача амал қилади. Моуриньо 13 июлдан жамоа билан иш бошлади, 18 август куни эса унинг расмий таништирув маросими ўтказилди.

2026 йилдаги "Реал Мадрид"

2026/27 йилги мавсумда жамоанинг биринчи сардори Федерико Вальверде ҳисобланади. У Дани Карвахаль клубни тарк этганидан кейин сардорлик мақомини қабул қилиб олди. Вальверденинг ўзи 2026 йил июлда биринчи сардор бўлиш катта шараф эканини таъкидлади.

Клуб президенти Флорентино Перес. У 2026 йил июнда ўтказилган президентлик сайловида 65 фоиз овоз билан ғалаба қозонди ва 2030 йилгача яна президент этиб сайланди.

2026 йил август ҳолатига кўра, "Реал Мадрид"нинг асосий совринлари:

15 та Европа чемпионлар кубоги / Чемпионлар лигаси; 36 та Испания чемпионлиги; 20 та Испания кубоги; 13 та Испания Суперкубоги; 6 та УЕФА Суперкубоги; 2 та УЕФА кубоги; 9 та клублар миқёсидаги жаҳон чемпионлиги.

"Реал Мадрид" FIFA томонидан XX асрнинг энг яхши футбол клуби деб эътироф этилган.

ЖАМОАНИНГ АСОСИЙ САРДОРЛАРИ

Франсиско Хенто — 1962–1971
Игнасио Соко — 1971–1974
Амансио Амаро — 1974–1976
Пирри — 1976–1980
Мигель Анхель — 1980–1986
Сантильяна — 1986–1988
Хосе Антонио Камачо — 1988–1989
Чендо — 1989–1993
Маноло Санчис — 1993–2001
Фернандо Йерро — 2001–2003
Рауль Гонсалес — 2003–2010
Икер Касильяс — 2010–2015
Серхио Рамос — 2015–2021
Марсело — 2021–2022
Карим Бензема — 2022–2023
Начо Фернандес — 2023–2024
Лука Модрич — 2024–2025
Дани Карвахаль — 2025–2026
Федерико Вальверде — 2026–ҳозирги вақтгача

ЖАМОАНИ БОШҚАРГАН МУРАББИЙЛАР

"Реал Мадрид" клуб тарихида инглиз Артур Жонсонни жамоанинг илк мураббийи сифатида тилга олади. Кейинги расмий мураббийлар хронологиясининг асосий қисми қуйидагича:

Хосе Анхель Берраондо — 1927–1929
Хосе Киранте — 1929–1930
Липпо Херцка — 1930–1932
Роберт Фирст — 1932–1934
Франсиско Бру — 1934–1941
Хуан Армет — 1941–1943
Рамон Энсинас — 1943–1945
Хасинто Кинкосес — 1945–1946, 1947
Бальтасар Альбенис — 1946–1947, 1950–1951
Майкл Кипинг — 1947–1950
Эктор Скароне — 1951–1952
Хуан Антонио Ипинья — 1952–1953
Энрике Фернандес — 1953–1954
Хосе Вильялонга — 1954–1957
Луис Карниглия — 1957–1959, 1959
Мигель Муньос — 1959, 1960–1973
Мануэль Флейтас — 1959–1960
Луис Моловни — 1973–1974, 1977–1979, 1982, 1985–1986
Милян Милянич — 1974–1977
Вуядин Бошков — 1979–1982
Альфредо Ди Стефано — 1982–1984, 1990–1991
Амансио Амаро — 1984–1985
Лео Беенхаккер — 1986–1989, 1991–1992
Жон Тошак — 1989–1990, 1999
Радомир Антич — 1991
Бенито Флоро — 1992–1994
Висенте дель Боске — 1994, 1995–1996, 1999–2003
Хорхе Вальдано — 1994–1995
Арсенио Иглесиас — 1996
Фабио Капелло — 1996–1997, 2006–2007
Юпп Хайнкес — 1997–1998
Гус Хиддинк — 1998–1999
Карлуш Кейруш — 2003–2004
Хосе Антонио Камачо — 2004
Мариано Гарсия Ремон — 2004
Вандерлей Лушембурго — 2004–2005
Хуан Рамон Лопес Каро — 2005–2006
Бернд Шустер — 2007–2008
Хуанде Рамос — 2008–2009
Мануэль Пеллегрини — 2009–2010
Жозе Моуриньо — 2010–2013
Карло Анчелотти — 2013–2015
Рафаэль Бенитес — 2015–2016
Зинедин Зидан — 2016–2018
Хулен Лопетеги — 2018
Сантьяго Солари — 2018–2019
Зинедин Зидан — 2019–2021
Карло Анчелотти — 2021–2025
Хаби Алонсо — 2025–2026
Альваро Арбелоа — 2026
Жозе Моуриньо — 2026–ҳозирги вақтгача