Реал Мадрид

"Реал Мадрид"нинг буюклиги фақат совринлар сони билан ўлчанмайди. Клубнинг 120 йилдан ортиқ тарихи давомида "Сантьяго Бернабеу" майдонида футбол тарихини ўзгартирган ўнлаб буюк ўйинчилар тўп сурди. Альфредо Ди Стефанодан Криштиану Роналдугача, Франсиско Хентодан Лука Модричгача бўлган авлодлар "Реал"нинг ғолиблик менталитетини шакллантирди.

Клуб FIFA томонидан XX асрнинг энг яхши футбол клуби деб эътироф этилган, Европа чемпионлар кубоги/Чемпионлар лигасида эса 15 марта ғолиб чиққан. Бу тарихнинг ортида турли даврларда "оқ футболка"ни афсонавий даражага олиб чиққан футболчилар турибди. (Real Madrid)

Альфредо Ди Стефано — "Реал" тарихини ўзгартирган футболчи

"Реал Мадрид"да: 1953–1964
Ўйинлари: 396
Голлари: 308
Европа кубоги: 5 марта
"Олтин тўп": 1957, 1959

Альфредо Ди Стефано "Реал Мадрид" тарихидаги энг муҳим шахслардан бири ҳисобланади. Аргентиналик футболчи 1953 йилда Мадридга келганидан сўнг клуб нафақат Испания, балки бутун Европа футболидаги асосий кучга айланди.

Ди Стефанонинг ўзига хослиги фақат голларида эмас эди. У ҳужумчи бўлишига қарамай, майдоннинг деярли барча нуқталарида ҳаракат қилар, ҳужум ташкил қилар, тўп учун курашар ва жамоа ўйинини бошқарарди.

У иштирок этган "Реал" Европа чемпионлар кубогининг дастлабки беш мавсумида кетма-кет чемпион бўлди. Ди Стефано эса ушбу беш финалнинг барчасида гол урди.

"Реал" сафида 396 та расмий учрашувда 308 гол урган Ди Стефано икки марта "Олтин тўп"ни қўлга киритди. 1989 йилда France Football унга тарихда ягона марта топширилган "Супер Олтин тўп" мукофотини берди. Кейинчалик у клубнинг фахрий президенти ҳам бўлди. (Real Madrid)

Франсиско Хенто — олти карра Европа чемпиони

"Реал Мадрид"да: 1953–1971
Ўйинлари: 600
Голлари: 182
Европа кубоги: 6 марта
Ла Лига: 12 марта

Франсиско Хенто "Реал" тарихидаги энг буюк қанот футболчиларидан бири. Фавқулодда тезлиги туфайли у "Кантабрия бўрони" лақабини олган.

Хенто Ди Стефано, Пушкаш, Копа ва Риаль билан биргаликда кетма-кет бешта Европа кубогини қўлга киритган афсонавий жамоанинг аъзоси эди.

1966 йилда эса Хенто аллақачон янгиланган "Yé-yé" авлодининг сардори сифатида олтинчи Европа кубогини боши узра кўтарди. Шу тариқа у Европа чемпионлар кубогини олти марта ютган тарихдаги биринчи футболчи бўлди.

Хенто 18 мавсумда 600 та расмий учрашув ўтказиб, 182 гол урди ва 12 марта Испания чемпиони бўлди. 2016 йилда у "Реал Мадрид"нинг фахрий президенти этиб сайланган. (Real Madrid)

Ференц Пушкаш — "Бернабеу"даги сеҳрли чап оёқ

"Реал Мадрид"да: 1958–1967
Ўйинлари: 262
Голлари: 242
Европа кубоги: 3 марта
Ла Лига: 5 марта

Ференц Пушкаш "Реал"га келганида 31 ёшда эди. Айримлар унинг энг яхши йиллари ортда қолган деб ҳисоблашган. Венгриялик буюк футболчи эса бу фикрларни майдонда бутунлай йўққа чиқарди.

Пушкаш 262 та ўйинда 242 та гол урди. Унинг кучли чап оёғи, зарбалари ва жарима майдонидаги маҳорати "Бернабеу" мухлисларини мафтун этди.

1960 йилги Европа чемпионлар кубоги финали унинг энг машҳур ўйинларидан бири бўлди. "Реал" Франкфуртнинг "Айнтрахт" клубини 7:3 ҳисобида енгган ўша учрашувда Пушкаш 4 та гол урган.

У "Реал" билан уч марта Европа кубоги ва беш марта Испания чемпионлигини қўлга киритди. Бугун FIFA йилнинг энг чиройли голи учун бериладиган мукофотни айнан Пушкаш номи билан атайди. (Real Madrid)

Амансио Амаро — "Галисиялик сеҳргар"

"Реал Мадрид"да: 1962–1976
Ўйинлари: 471
Голлари: 155
Европа кубоги: 1 марта
Ла Лига: 9 марта

Ди Стефано авлодидан кейин "Реал"га янги етакчилар керак эди. Улардан бири Амансио Амаро бўлди.

Тезлиги, дриблинги ва техник маҳорати учун Амансио "El Brujo" — "Сеҳргар" лақабини олган. У "Yé-yé" авлодининг асосий футболчиларидан бири эди.

1966 йилги Европа чемпионлар кубоги финалида "Партизан" ҳисобни очди. Аммо Амансио ажойиб ҳаракатдан сўнг ҳисобни тенглаштирди, Серена эса ғалаба голини урди — 2:1.

Амансио "Реал" билан 9 марта Ла Лига ва 3 марта Испания кубогини ҳам қўлга киритди. Кейинчалик мураббий сифатида у "Кастилья"да Бутрагеньо, Санчис, Мичел ва Мартин Васкес каби футболчилардан иборат машҳур авлоднинг шаклланишида катта роль ўйнади. (Real Madrid)

Пирри — "Реал" характери тимсоли

"Реал Мадрид"да: 1964–1980
Ўйинлари: 561
Голлари: 172
Совринлари: 15 та

Хосе Мартинес Санчес — Пирри "Реал Мадрид"да фидойилик рамзи сифатида қолган.

У ҳимоячи, ярим ҳимоячи ва зарурат туғилганда ҳужумчи сифатида ҳам ўйнай оларди. Шу билан бирга 561 ўйинда 172 гол ургани унинг қанчалик универсал футболчи бўлганини кўрсатади.

Пиррининг иродаси ҳақида кўплаб тарихий воқеалар мавжуд. У 1971 йил Кубок эгалари кубоги финалида қўли жароҳатланган ҳолда, 1975 йил Испания кубоги финалида эса жағи синганига қарамай майдонга тушган.

У 1966 йилги Европа кубоги, 10 та Ла Лига ва 4 та Испания кубогини қўлга киритган. Пирри клубнинг олий мукофотларидан бири — "Laureada"ни олган биринчи футболчи бўлди.

2023 йилдан буён Пирри "Реал Мадрид"нинг фахрий президенти ҳисобланади. (Real Madrid)

Сантильяна — ҳаводаги қирол

"Реал Мадрид"да: 1971–1988
Ўйинлари: 645
Голлари: 290

Карлос Алонсо Гонсалес футбол оламига "Сантильяна" номи билан танилди.

Унинг бўйи марказий ҳужумчилар учун фавқулодда баланд бўлмаган. Аммо сакраш қобилияти туфайли Сантильяна ҳаводаги курашларда деярли енгилмас эди.

17 мавсум давомида у "Реал" учун 645 та учрашувда 290 гол урди. Фаолиятини якунлаган пайтда клуб тарихида фақат Ди Стефано ундан кўпроқ гол урган эди.

Сантильяна 9 марта Испания чемпиони, 4 марта Испания кубоги ва икки марта УЕФА кубоги соҳиби бўлди. У айниқса "Бернабеу"даги машҳур еврокубок камбэкларининг асосий қаҳрамонларидан бири эди. (Real Madrid)

Хуанито — "Бернабеу"нинг ўлмас руҳи

"Реал Мадрид"да: 1977–1987
Ўйинлари: 401
Голлари: 121

Хуан Гомес Гонсалес — Хуанито статистикадан ҳам каттароқ афсона.

Унинг техникаси, характери, жанговорлиги ва "Реал"га бўлган муҳаббати мадридисталар учун алоҳида аҳамиятга эга.

Хуанито 401 учрашувда 121 гол урди. У 5 марта Ла Лига, икки марта Испания кубоги ва икки марта УЕФА кубогини қўлга киритди.

1985/86 йилги УЕФА кубогида "Реал" "Боруссия Мёнхенгладбах"га биринчи учрашувда 1:5 ҳисобида мағлуб бўлганидан кейин "Бернабеу"да 4:0 ҳисобида ғалаба қозониб, тарихий камбэкни амалга оширган. Хуанитонинг ўша тунги эҳтироси "Реал"нинг таслим бўлмас характерининг рамзига айланди.

Хуанито 1992 йил 2 апрелда автоҳалокатда 37 ёшида вафот этди. Шундан буён "Сантьяго Бернабеу"да ўтадиган ўйинларнинг 7-дақиқасида мухлислар "Illa, illa, illa, Juanito maravilla!" дея уни хотирлайдилар. (Real Madrid)

Эмилио Бутрагеньо — "La Quinta del Buitre" етакчиси

"Реал Мадрид"да: 1984–1995
Ўйинлари: 463
Голлари: 171

1980-йилларда "Реал" академиясидан испан футболи тарихидаги энг машҳур авлодлардан бири етишиб чиқди.

Бутрагеньо, Санчис, Мичел, Мартин Васкес ва Пардеса биргаликда "La Quinta del Buitre" номини олди. Ном Бутрагеньонинг "El Buitre" — "Калхат" лақабидан келиб чиққан.

Бутрагеньо 1984 йилда "Кадис"га қарши дебют учрашувида захирадан майдонга тушиб, икки гол урди ва яна бир голга узатма берди. "Реал" 0:2 ҳисобида ортда бораётган учрашувни 3:2 ҳисобида ютиб кетди.

У клуб билан икки марта УЕФА кубоги ва олти марта Ла Лигада ғолиб чиқди. 463 та расмий учрашувда 171 гол урди. (Real Madrid)

Уго Санчес — жарима майдонининг мексикалик қироли

"Реал Мадрид"да: 1985–1992
Ўйинлари: 282
Голлари: 208

Уго Санчес "La Quinta del Buitre" авлодининг академия тарбияланувчиси эмасди, аммо унинг голлари ўша жамоани янада кучли қилди.

Мексикалик ҳужумчи 282 учрашувда 208 гол урди. У акробатик зарбалари ва голлардан кейинги машҳур сальтоси билан мухлисларни ҳайратга соларди.

Уго "Реал" билан кетма-кет беш марта Испания чемпиони бўлди. Мадриддаги фаолияти давомида тўрт марта Ла Лиганинг энг яхши тўпурари — "Пичичи" бўлди.

1989/90 йилги чемпионатда у 38 та гол урган ва уларнинг барчасини бир тегишда киритгани унинг ҳужумчилик маҳоратини янада машҳур қилган. (Real Madrid)

Маноло Санчис — икки даврни бирлаштирган сардор

"Реал Мадрид"да: 1983–2001
Ўйинлари: 710

Маноло Санчис "La Quinta del Buitre"нинг энг узоқ вақт "Реал"да қолган аъзоси бўлди.

У клуб академиясида ўсди ва бутун профессионал фаолиятини "Реал Мадрид"га бағишлади. 710 та расмий учрашув билан у клуб тарихида энг кўп майдонга тушган футболчилар қаторида туради.

Бутрагеньо авлодининг Европа чемпионлар кубогини ютиш орзуси амалга ошмаган бўлса-да, Санчис бу мақсадга кейинги авлод билан эришди.

1998 йилда сардор сифатида "Ювентус" устидан ғалаба қозониб, клубнинг 32 йиллик танаффусдан кейинги еттинчи Европа кубогини боши узра кўтарди. 2000 йилда эса саккизинчи Европа кубогини ҳам қўлга киритди. (Real Madrid)

Фернандо Йерро — гол урадиган ҳимоячи

"Реал Мадрид"да: 1989–2003
Ўйинлари: 601
Голлари: 127

Фернандо Йерро марказий ҳимоячи учун ғайриоддий тўпурарлик кўрсаткичига эга эди.

У "Реал" сафида 601 та учрашувда 127 гол киритди. Йерро ярим ҳимояда ҳам, марказий ҳимояда ҳам юқори даражада ўйнай оларди.

Унинг кучли зарбаси, стандарт вазиятлардаги маҳорати ва ҳаводаги устунлиги рақиб дарвозаси учун доимий хавф эди.

Йерро 1998, 2000 ва 2002 йилларда Европа чемпионлар лигасини қўлга киритган "Реал"нинг етакчиларидан бири бўлди. 1998 йилги финалда у "Ювентус"нинг асосий юлдузи Алессандро Дель Пьерони нейтраллаштиришда катта роль ўйнади. (Real Madrid)

Рауль Гонсалес — "Реал"нинг абадий сардори

"Реал Мадрид"да: 1994–2010
Ўйинлари: 741
Голлари: 323

Рауль "Реал Мадрид" академиясининг энг буюк маҳсулотларидан бири.

Қизиғи, у дастлаб "Атлетико" академиясида ўйнаган. Кейин "Реал" тизимига қўшилди ва 17 ёшида биринчи жамоада дебют қилди.

Рауль 741 та расмий учрашув билан "Реал Мадрид" тарихида энг кўп ўйин ўтказган футболчи бўлиб қолмоқда.

У 323 гол урди ва узоқ вақт клуб тарихидаги энг яхши тўпурар бўлди.

Рауль 1998, 2000 ва 2002 йилларда Чемпионлар лигасини қўлга киритди. 2000 йил "Валенсия"га ва 2002 йил "Байер"га қарши финалларда гол ҳам урди.

Унинг меҳнатсеварлиги, камтарлиги ва майдонда охиригача курашиши "Реал" сардори қандай бўлиши кераклигининг намунасига айланган. (Real Madrid)

Роберто Карлос — чап қанотдаги ракета

"Реал Мадрид"да: 1996–2007
Ўйинлари: 527
Голлари: 68
Европа кубоги: 3 марта

Роберто Карлос футбол тарихида қанот ҳимоячиси тушунчасини ўзгартирган ўйинчилардан бири.

Бразилияликнинг тезлиги, ҳужумларга қўшилиши ва фавқулодда кучли чап оёғи унинг визит карточкаси эди.

У 11 мавсум "Реал" шарафини ҳимоя қилди ва 527 та ўйин ўтказди. Уч марта Чемпионлар лигаси ғолиби бўлди.

2002 йилги Чемпионлар лигаси финалида айнан Роберто Карлоснинг чап қанотдан оширган тўпи Зиданнинг тарихий голига замин яратган. (Real Madrid)

Зинедин Зидан — футболчи ва мураббий сифатидаги афсона

Футболчи сифатида: 2001–2006
Ўйинлари: 227
Голлари: 49
Бош мураббий: 2016–2018, 2019–2021

2001 йилда "Ювентус"дан жаҳон рекордига яқин суммага сотиб олинган Зинедин Зидан "Галактикос"нинг бош юлдузларидан бири бўлди.

Унинг техникаси, тўп назорати ва майдонни кўра билиши футболни санъат даражасига олиб чиққан.

Зиданнинг "Реал"даги энг машҳур лаҳзаси 2002 йил Чемпионлар лигаси финалида содир бўлди. Роберто Карлоснинг узатмасидан кейин француз тўпни ерга туширмасдан чап оёғи билан дарвозага йўллади. "Байер" дарвозасига урилган бу гол футбол тарихидаги энг машҳур финал голларидан бирига айланди.

Зидан футболчи сифатида 227 ўйинда 49 гол уриб, 6 та соврин қўлга киритди.

Аммо унинг "Реал"даги афсонаси шу билан тугамади. Бош мураббий сифатида Зидан 11 та соврин, жумладан 2016, 2017 ва 2018 йилларда кетма-кет учта Чемпионлар лигасини қўлга киритди. (Real Madrid)

Икер Касильяс — "Сан-Икер"

"Реал Мадрид"да: 1999–2015
Ўйинлари: 725
Совринлари: 19 та

Икер Касильяс "Реал" академиясига атиги 9 ёшида келган ва кейинчалик клуб тарихидаги энг буюк дарвозабонлардан бирига айланган.

1999 йилда асосий жамоада дебют қилган Касильяс 725 та учрашувда майдонга тушди.

2002 йил Чемпионлар лигаси финалида "Байер"га қарши сўнгги дақиқаларда амалга оширган сейвлари "Реал"нинг тўққизинчи Европа кубогини қўлга киритишида ҳал қилувчи аҳамиятга эга бўлди.

Кейинчалик у жамоа сардорига айланди ва 2014 йил Лиссабонда "Атлетико"га қарши финалдан кейин "Ла Десима" — ўнинчи Европа кубогини боши узра кўтарди.

Касильяс "Реал" билан 19 та соврин қўлга киритган. Испания терма жамоаси сардори сифатида эса Жаҳон чемпионати ва икки марта Европа чемпионлигини ютган. (Real Madrid)

Криштиану Роналду — клуб тарихидаги энг яхши тўпурар

"Реал Мадрид"да: 2009–2018
Ўйинлари: 438
Голлари: 451
Чемпионлар лигаси: 4 марта

Криштиану Роналдунинг "Реал"даги статистикаси футбол тарихидаги энг ҳайратланарли кўрсаткичлардан бири.

Португалиялик суперюлдуз 2009 йилда "Манчестер Юнайтед"дан келиб, 9 мавсум давомида 438 та расмий учрашувда 451 гол урди.

Яъни у бир ўйинга ўртача биттадан кўпроқ гол киритган.

Криштиану:

Ла Лигада — 312 гол;

Чемпионлар лигасида — 105 гол;

Испания кубогида — 22 гол;

бошқа мусобақаларда — 12 гол урган.

У "Реал" билан тўрт марта Чемпионлар лигасини қўлга киритди ва клубнинг 2014–2018 йилларда Европадаги ҳукмронлигининг асосий тимсоли бўлди.

2013/14 йилги Чемпионлар лигасида Криштиану 17 та гол уриб, бир мавсум учун мусобақа рекордини ўрнатди.

У "Реал" футболчиси сифатида тўрт марта "Олтин тўп"га сазовор бўлди. (Real Madrid)

Серхио Рамос — 93-дақиқа қаҳрамони

"Реал Мадрид"да: 2005–2021
Ўйинлари: 671
Голлари: 101
Совринлари: 22 та

Серхио Рамоснинг "Реал" тарихидаги ўрнини битта рақам билан ифодалаш мумкин — 92:48.

2014 йил Чемпионлар лигаси финалида "Атлетико" 1:0 ҳисобида олдинда бораётган эди. Ўйиннинг 93-дақиқасида Лука Модрич бурчакдан тўп узатди, Рамос эса бош билан ҳисобни тенглаштирди.

Қўшимча вақтда "Реал" 4:1 ҳисобида ғалаба қозониб, 12 йил кутилган "Ла Десима"ни қўлга киритди.

Рамос 16 мавсумда 671 та ўйин ўтказиб, ҳимоячи бўлишига қарамай 101 гол урди.

У 22 та соврин, жумладан тўртта Чемпионлар лигасини қўлга киритди. Сардор сифатида 2016, 2017 ва 2018 йилларда Европа кубогини кетма-кет уч марта боши узра кўтарди. (Real Madrid)

Марсело — чап қанотнинг бразилиялик сеҳргари

"Реал Мадрид"да: 2006–2022
Ўйинлари: 546
Голлари: 38
Совринлари: 25 та

Марсело 18 ёшида Мадридга келиб, Роберто Карлоснинг муносиб ворисига айланди.

У оддий ҳимоячидан кўра кўпроқ плеймейкерга ўхшарди. Техникаси, паслари ва дриблинги уни "Реал" ҳужумларининг муҳим қисмига айлантирди.

2014 йил "Атлетико"га қарши "Ла Десима" финалида Марсело қўшимча вақтда гол урди.

2022 йил Парижда эса у жамоа сардори сифатида "Реал"нинг 14-Европа кубогини боши узра кўтарди.

Марсело 546 та учрашувда иштирок этиб, 25 та соврин, жумладан 5 та Чемпионлар лигасини қўлга киритди. (Real Madrid)

Карим Бензема — ёрдамчидан "Олтин тўп" соҳибигача

"Реал Мадрид"да: 2009–2023
Ўйинлари: 648
Голлари: 354
Чемпионлар лигаси: 5 марта
"Олтин тўп": 2022

Карим Бензема "Реал"да 14 мавсум ўтказди.

Дастлаб у Криштиану Роналду атрофидаги ҳужум тизимининг муҳим қисми эди. Роналду кетганидан кейин эса Бензема жамоанинг асосий етакчисига айланди.

2021/22 йилги мавсум француз футболчисининг фаолиятидаги чўққи бўлди. У барча мусобақаларда 44 гол уриб, Чемпионлар лигасида ПСЖ, "Челси" ва "Манчестер Сити"га қарши ҳал қилувчи ўйинларни ўтказди.

Ўша мавсумда Бензема Чемпионлар лигасида 15 гол билан мусобақа тўпурари бўлди ва "Реал" 14-Европа кубогини қўлга киритди.

Натижада Бензема 2022 йилги "Олтин тўп" соҳиби бўлди.

У клубни 648 учрашув, 354 гол ва 25 та соврин билан тарк этди. Криштиану Роналдудан кейин клуб тарихидаги иккинчи энг яхши тўпурар ҳисобланади. (Real Madrid)

Тони Кроос — паслар меъмори

"Реал Мадрид"да: 2014–2024
Ўйинлари: 465
Голлари: 28
Совринлари: 23 та

Тони Кроос 2014 йил "Бавария"дан келди ва жуда қисқа вақт ичида "Реал" марказий чизиғининг бошқарувчисига айланди.

Кроос, Каземиро ва Лука Модричдан ташкил топган учлик футбол тарихидаги энг кучли ярим ҳимоя чизиқларидан бири сифатида қолди.

Немис футболчисининг кучли жиҳати тезлик ёки жисмоний устунлик эмас, балки футболни бошқалардан бир неча сония олдин "ўқий" олиш қобилияти эди.

У "Реал"да ўтказган 10 мавсумда 465 та ўйинда қатнашди ва 23 та соврин, жумладан 5 та Чемпионлар лигасини қўлга киритди.

2024 йил "Боруссия Дортмунд"га қарши Чемпионлар лигаси финали Крооснинг клубдаги сўнгги учрашуви бўлди. У "Реал"даги фаолиятини 15-Европа кубоги билан якунлади. (Real Madrid)

Лука Модрич — 28 совринлик афсона

"Реал Мадрид"да: 2012–2025
Ўйинлари: 597
Голлари: 43
Совринлари: 28 та
Европа кубоги: 6 марта
"Олтин тўп": 2018

Лука Модрич 2012 йилда "Тоттенхэм"дан сотиб олинганида бу трансфернинг нақадар тарихий бўлишини кўпчилик тасаввур ҳам қилмаган эди.

Хорватиялик футболчи кейинги 13 мавсум давомида "Реал" марказий чизиғининг юрагига айланди.

Модричнинг ташқи томон билан берган паслари, майдонни кўриши, прессинг остидаги хотиржамлиги ва ўйин темпини бошқариш маҳорати уни ўз авлодининг энг яхши ярим ҳимоячиларидан бирига айлантирди.

2018 йилда у Криштиану Роналду ва Лионель Мессининг узоқ йиллик ҳукмронлигини бузиб, "Олтин тўп"ни қўлга киритди.

Модрич "Реал" сафида 597 учрашув ўтказиб, 43 гол урди ва 28 та соврин қўлга киритди. У 6 марта Европа кубоги соҳиби бўлди.

2025 йилда клубдан кетган пайтида Модрич "Реал Мадрид" тарихида энг кўп соврин қўлга киритган футболчи эди. (Real Madrid)

Афсоналарни бирлаштирадиган бир хусусият

Ди Стефано, Хенто ва Пушкаш Европани биринчи бор забт этган авлод эди.

Амансио ва Пирри улардан кейин "Реал"нинг ғолиблик анъанасини давом эттирди.

Сантильяна ва Хуанито "Бернабеу"даги буюк камбэклар руҳини яратди.

Бутрагеньо, Уго Санчес ва Санчис 1980-йилларда Испания футболида ҳукмронлик қилди.

Рауль, Йерро, Роберто Карлос ва Зидан клубни Европа тахтига қайтарди.

Касильяс "Галактикос" даври билан янги олтин авлод ўртасидаги кўприк бўлди.

Криштиану Роналду, Серхио Рамос, Марсело, Бензема, Кроос ва Модрич эса "Реал Мадрид"ни XXI асрда яна Европанинг мутлақ ҳукмрон кучига айлантирган авлоднинг тимсолларидир.

Даврлар, мураббийлар ва футбол услуби ўзгарди. Аммо "Реал Мадрид" афсоналарини бирлаштириб турадиган асосий хусусият ўзгармади — ғалаба учун охирги сониягача курашиш.

Шу сабаб "Реал Мадрид" тарихида афсона бўлиш учун фақат кўп ўйин ўтказиш ёки кўп гол уришнинг ўзи кифоя эмас. Клуб тарихини ўзгартирадиган лаҳзаларни яратиш керак.

Ди Стефанонинг беш финалдаги голлари, Хентонинг олтинчи Европа кубоги, Хуанито давридаги камбэклар, Раульнинг сардорлиги, Зиданнинг Глазгодаги воллейи, Касильяснинг сейвлари, Рамоснинг 93-дақиқадаги голи, Криштианунинг рекордлари ва Модричнинг узоқ йиллик маҳорати — буларнинг барчаси "Реал Мадрид"ни оддий футбол клубидан жаҳон футболи тарихидаги алоҳида феноменга айлантирган воқеалардир.