Shanba oqshomida “Manchester Yunayted” Angliya Kubogi doirasida “Reding”ni qabul qildi va yirik 4-0 hisobida zafar quchdi. Birinchi golga mualliflik qilgan Ueyn Runi uchun bu 543 uchrashuvda 249-si bo‘ldi va jamoa tarixidagi eng yaxshi to‘purarlardan biriga aylandi. «Shrek» to‘purarlik borasida afsonaviy Ser Bobbi Charltonga yetib oldi. Hali mavsumning qolgan qismini hisobga olsak, futbolchi bemalol bu ko‘rsatkichini yaxshilash imkoniyatiga ega.

«Bu ko‘rsatkich kelajakda ham saqlanib qolmasligidan hafa emasman, bir kun kelib bu sodir bo‘lishi aniq edi va bu rekord Ueyn Runiga tegishli bo‘lishidan juda xursandman. U butun faoliyati davomida “Manchester Yunayted” va Angliya terma jamoasiga qo‘shgan hissasidan faxrlansa ham bo‘laveradi. U ajoyib iqtidorga ega va uni amalda ko‘rish yoqimli» - degan edi Bobbi Charlton avgust oyining boshlarida.

2004-yilda “Old Trafford”da, Chempionlar Ligasi doirasida “Fenerbahche”ga qarshi bahsda o‘zining debyut o‘yinida xet-trik qayd etgan 19 yoshli futbolchi 12 mavsum mobaynida jamoaning yetakchilaridan biriga aylandi.

Sof hujumchi rolida o‘ynamagan bo‘lsada, Ueyn Runi jamoa tarixidagi o‘nlikka kira oldi. Samaradorlik bo‘yicha faqatgina Denis Lou (404 o‘yinda 237ta gol) va Denis Viole (293 o‘yinda 179 ta gol) undan yaxshiroq ko‘rsatkichga ega.

Runi o‘tgan mavsumlar mobaynida o‘zining yorqin o‘yinlarini ko‘rsata oldi. Albatta so‘nggi ikki mavsumda uning o‘yinida pasayish kuzatilayotganini eslab o‘tish kerak. Runining rosmana “ochilishi” 2009-2010-yilgi va 2011-2012-yilgi mavsumlarga to‘g‘ri keladi. Krishtianu Ronalduning «Real” Madridga o‘tishi unga barcha jabhada porlashga zamin yaratdi. 2009-2010-yilgi mavsumda barcha chempionatlarni qo‘shib hisoblaganda Runi 44 o‘yinda 34 ta gol urdi. Ikki yil o‘tib esa Premyer Ligadagi o‘zi uchun rekord natija – 27 ta gol urdi. Shunga qaramay, to‘purarlar bahsida ikkinchi bo‘ldi. Yetakchilikni bo‘lajak jamoadoshi Robin van Persi egalladi.

“Arsenal” jamoasi Runining sevimli “o‘ljasi” hisoblanadi. Ueyn Runi hozirgacha Arsen Venger jamoasiga 14 ta gol urgan. 2011-yilgi 8-2 bilan tugagan o‘yinda esa Runi xet-trik qayd etgandi.