FIFAning 2016 yilda jahonning eng yaxshi futbolchisiga atalgan "The Best" sovrinini Krishtianu Ronaldu qo‘lga kiritdi. "Real" futbolchisi marosimda sovrinni qabul qilib olganidan keyin o‘z fikrlarini bildirib o‘tdi.  

«Shunchaki ajoyib! Bunday holat faoliyatimda ilk marta emas, ammo ushbu sovrinni birinchi marta qo‘lga kirityapman. Juda ham xursandman. Birinchi navbatda jamoadoshlarim, "Real"ning barcha azolariga, murabbiylarga minnatdorchilik bildirmoqchiman. Oilamga, onamga, barchaga rahmat.2016 yil faoliyatimdagi eng yaxshi yil bo‘ldi. Menda ko‘p shubhalar bor edi, lekin ushbu sovrin muvaffaqiyatlarimning natijasi bo‘ldi. Muhim musobaqalarda g‘oliblikni qo‘lga kiritganimdan keyin shubhalar tarqab ketdi. Ham shaxsiy, ham sport tomonlama ajoyib yil bo‘ldi. Men buni unutmayman.

Men uchun ovoz bergan barchaga — muxlislarga, terma jamoalar sardorlari va jurnalistlarga katta rahmat. Ortiqcha so‘z aytishim shart emas, sovrinning o‘zi barchasini aytib turibdi. Afsuski, "Barselona" vakillari bugun marosimda ishtirok etishmadi, lekin bu tushunarli. Barchaga rahmat», — dedi Ronaldu.

«Barselona» futbolchilari bugungi marosimga tashrif buyurmaslikka qaror qilishdi. Ular bu qarorni Ispaniya kubogi doirasida "Atletik"ga qarshi bo‘ladigan javob o‘yiniga tayyorgarlik bilan izohlashdi. Bilbaoda o‘tgan o‘yinda kataloniyaliklar 1:2 hisobida imkoniyatni boy berishgandi.