ФИФАнинг 2016 йилда жаҳоннинг энг яхши футболчисига аталган "The Best" совринини Криштиану Роналду қўлга киритди. "Реал" футболчиси маросимда совринни қабул қилиб олганидан кейин ўз фикрларини билдириб ўтди.  

«Шунчаки ажойиб! Бундай ҳолат фаолиятимда илк марта эмас, аммо ушбу совринни биринчи марта қўлга киритяпман. Жуда ҳам хурсандман. Биринчи навбатда жамоадошларим, "Реал"нинг барча азоларига, мураббийларга миннатдорчилик билдирмоқчиман. Оиламга, онамга, барчага раҳмат.2016 йил фаолиятимдаги энг яхши йил бўлди. Менда кўп шубҳалар бор эди, лекин ушбу соврин муваффақиятларимнинг натижаси бўлди. Муҳим мусобақаларда ғолибликни қўлга киритганимдан кейин шубҳалар тарқаб кетди. Ҳам шахсий, ҳам спорт томонлама ажойиб йил бўлди. Мен буни унутмайман.

Мен учун овоз берган барчага — мухлисларга, терма жамоалар сардорлари ва журналистларга катта раҳмат. Ортиқча сўз айтишим шарт эмас, совриннинг ўзи барчасини айтиб турибди. Афсуски, "Барселона" вакиллари бугун маросимда иштирок этишмади, лекин бу тушунарли. Барчага раҳмат», — деди Роналду.

«Барселона» футболчилари бугунги маросимга ташриф буюрмасликка қарор қилишди. Улар бу қарорни Испания кубоги доирасида "Атлетик"га қарши бўладиган жавоб ўйинига тайёргарлик билан изоҳлашди. Бильбаода ўтган ўйинда каталонияликлар 1:2 ҳисобида имкониятни бой беришганди.