«Barselona» yarimhimoyachisi Andres Inyesta «Real»ning bir qancha futbolchilariga qo‘ng‘iroq qilib, yilning eng yaxshilarini taqdirlash marosimida ishtirok etmaganliklari uchun klub nomidan uzr so‘radi.
Marca xabariga ko‘ra, Inyesta raqib jamoani har doim hurmat qilishini, ammo oldinda Ispaniya kubogining javob o‘yini kutayotganini inobatga olib, FIFA tomonidan tashkil qilingan yilning eng yaxshilarini taqdirlash tadbiriga borishning imkoni bo‘lmaganini aytgan.
Eslatib o‘tamiz, 12 yanvar kuni «Barselona» Ispaniya kubogining javob o‘yinida «Atletik»ni qabul qiladi. Dastlabki o‘yinda «blaugranas» 1:2 hisobida mag‘lub bo‘lgan.
