O‘tgan 2016 yilgi mavsumda oltin dublni qayd etgan Qarshining “Sevinch” jamoasi 16 yanvardan yangi mavsum tayyorgarliklarini boshlaydi.
Shu kuni futbolchilar Qarshi shahridagi klub qarorgohida yig‘ilishadi va yangi mavsum tayyorgarlik mashg‘ulotlariga kirishadi.
Jamoa bu yil ham 22 yanvardan Toshkent shahrida boshlanadigan mini futbol (futzal) bo‘yicha XIII O‘zbekiston chempionatida ishtirok etadi. Shu munosabat bilan dastlabki tayyorgarlik mashg‘ulotlari ana shu chempionatga qaratiladi.
“Sevinch” futbolning ushbu turi bo‘yicha ham mamlakatimiz ayollar jamoalari o‘rtasida yetakchi hisoblanadi. Jamoa mini futbol bo‘yicha 12 karra O‘zbekiston chempioni va 10 marta O‘zbekiston kubogi sohibi bo‘lgan.
Ayni kunlarda jamoaning 9 nafar futbolchisi va 2 nafar murabbiyi Olmaliq shahrida o‘tkazilayotgan O‘zbekiston milliy terma jamoasi yig‘inida ishtirok etishmoqda. Ushbu yig‘in 19 yanvar kuni nihoyasiga yetadi va futbolchilarimiz jamoa safiga kelib qo‘shilishadi.
