Ўтган 2016 йилги мавсумда олтин дублни қайд этган Қаршининг “Севинч” жамоаси 16 январдан янги мавсум тайёргарликларини бошлайди.
Шу куни футболчилар Қарши шаҳридаги клуб қароргоҳида йиғилишади ва янги мавсум тайёргарлик машғулотларига киришади.
Жамоа бу йил ҳам 22 январдан Тошкент шаҳрида бошланадиган мини футбол (футзал) бўйича XIII Ўзбекистон чемпионатида иштирок этади. Шу муносабат билан дастлабки тайёргарлик машғулотлари ана шу чемпионатга қаратилади.
“Севинч” футболнинг ушбу тури бўйича ҳам мамлакатимиз аёллар жамоалари ўртасида етакчи ҳисобланади. Жамоа мини футбол бўйича 12 карра Ўзбекистон чемпиони ва 10 марта Ўзбекистон кубоги соҳиби бўлган.
Айни кунларда жамоанинг 9 нафар футболчиси ва 2 нафар мураббийи Олмалиқ шаҳрида ўтказилаётган Ўзбекистон миллий терма жамоаси йиғинида иштирок этишмоқда. Ушбу йиғин 19 январ куни ниҳоясига етади ва футболчиларимиз жамоа сафига келиб қўшилишади.
