Sports.uz 2016 yilgi mavsum yakunlarini hisob-kitob qilib, oliy ligada to‘p surgan eng yaxshi yosh to‘purarlar reytingini tuzdi.

Eng yaxshi yosh goleadorlar

1. Ixtiyor Toshpo‘latov («So‘g‘diyona»). 23 yosh. 13ta o‘yin, 5ta gol.

«So‘g‘diyona» vakili uchun mavsum yomon o‘tmadi. Toshpo‘latov 13ta o‘yinda maydonga tushib, 5ta gol urdi. Hoynahoy, murabbiylar bu yil unga ko‘proq o‘ynash imkoniyatini taqdim etishadi.

2. Jamshid Iskanderov («Paxtakor»). 23 yosh. 21ta o‘yin, 7ta gol.

Agar Iskanderovning 2015 yilgi natijalari inobatga olinsa, bu mavsum uning uchun yaxshi o‘tgani oydinlashadi. Ammo Jamshidning gollari «Paxtakor»ning kuchli to‘rtlikka kirishiga yetarli bo‘lmadi.

3. Jaloliddin Masharipov («Paxtakor»). 23 yosh. 30ta o‘yin, 7ta gol.

Masharipov o‘tgan mavsumdagi eng yaxshi yosh futbolchilardan biri ekanligi shubhasiz. «Lokomotiv»ga qarshi bahsda «dubl» qayd etib, jamoasi g‘alabasiga zamin hozirladi. Shu tariqa milliy termadan chaqiruv oldi.

4. Doston Hamdamov («Bunyodkor»). 20 yosh. 28ta o‘yin, 9ta gol.

Ushbu reytingdagi eng navqiron o‘yinchi. 2015 yilgi Osiyoning eng yaxshi yosh futbolchisi o‘tgan mavsum 9ta gol urib, klubining chempionat kumush medallarini qo‘lga kiritishiga ko‘maklashdi.

5. Eldor Shomurodov («Bunyodkor»). 21 yosh. 27ta o‘yin, 10ta gol.

Eldor ushbu mavsumda 10ta gol urib, ajoyib barqarorlik ko‘rsatdi. Uning bugungi kunda milliy termamizning asosiy o‘yinchilaridan biri ekani bejiz emas, albatta.

6. Igor Sergeev («Paxtakor»). 23 yosh. 15ta o‘yin, 11ta gol.

Sergeev birinchi davrada 15ta uchrashuvda maydonga tushib, o‘z hisobiga 11ta gol yozib qo‘ydi. Shundan so‘ng ijara asosida Xitoy klubiga ko‘chib o‘tdi. Ammo Chin o‘lkasida uning o‘yini qovushmadi.

7. Shohruz Norxonov («Obod»). 23 yosh. 29ta o‘yin, 14ta gol.

Navqiron goleadorlar reytingi yetakchisi ushbu mavsum 29ta bahsda raqiblar darvozasini 14 marta ishg‘ol qilib, eng yosh to‘purarga aylandi. Mabodo «Obod» hujumchisi 2017 yilgi chempionatni oliy liga grandlaridan birining tarkibida boshlasa, aslo ajablanmaymiz.