"Olmaliq"ning Antaliyadagi o‘quv-mashg‘ulot yig‘ini davom etmoqda.

12 yanvardan kuniga ikki mahal mashg‘ulot o‘tkazayotgan futbolchilarga barcha sharoit yaratib berilgan. "Kremlin" mehmonxonasiga tegishli sport majmuasida 4ta tabiiy maydon mavjud. Shuningdek, trenajer zali, sauna, basseyn hamda ovqatlanish majmualari har kuni mehmonlar uchun shay holatda.

Bevosita jamoaning mashg‘ulotlariga to‘xtaladigan bo‘lsak, birinchi mashg‘ulot davomida futbolchilar bir necha guruhga bo‘lingan holatda turli xildagi texnik va taktik ishlanmalar bilan band bo‘lishmoqda. Har bir chiziq vakillari uchun maxsus mashqlar olib borilmoqda.

Ikkinchi mashg‘ulotning birinchi qismida ertalabki mashqlar umumlashtirilgan holda, jamoaviy harakatlar orqali shakllantirilmoqda. Mashg‘ulotning ikkinchi qismi trenajer zalida jismoniy yuklamalar bilan davom ettirilmoqda. Shuningdek, kechki mashg‘ulotlardan so‘ng, futbolchilar sauna va basseyndan ham foydalanishmoqda.

Toshkentdagi yig‘in bilan solishtirganda futbolchilar yangi murabbiy tomonidan qo‘yilayotgan talablarni mukammal bajarish borasida ijobiy o‘zgarishlar kuzatilmoqda.

Mashg‘ulotlar bir kunda umumiy hisobda 5 soatdan oshmoqda. Jamoaning bu yig‘ini 26 yanvarga qadar davom etadi.