Madridning «Real» klubi mavsumdagi ketma-ket ikkinchi mag‘lubiyatini qabul qilib oldi. Ispaniya kubogi doirasida «Selta»ni qabul qilgan Zayniddin Zidan shogirdlari 1:2 hisobida yengildi.

Uchrashuv qahramoni sifatida vigoliklardan Yago Aspasni ko‘rsatish o‘rinli. U avvaliga hisob ochuvchi golga mualliflik qildi. Keyinroq esa golli uzatmani amalga oshirdi. Mezbonlardan hisob tenglashtiruvchi gol Marselo hisobiga yozildi.

Ispaniya kubogining 1/8 finalida «Real» «Sevilya» klubini turnirdan chiqarib yuborgan bo‘lib, safardagi durang sabab (3:3) mag‘lub bo‘lmaslik seriyasi bo‘yicha «Barselona»ning rekordini yangilagandi.

Shundan keyin La liga doirasida yana o‘sha «Sevilya» maydonida mehmon bo‘lgan «Real» 1:2 hisobida imkoniyatni boy berdi va 40 ta o‘yin davom etgan seriyani yakunladi. Endi esa «Selta» Madriddan g‘alaba bilan qaytdi. «Real» joriy mavsum hisobidan «Santyago Bernabeu»da mag‘lub bo‘lmagandi.

Tomonlarning Vigo shahrida kechadigan javob o‘yini 25 yanvar sanasiga tayin qilingan. 1/4 finaldan joy olgan yana ikki bellashuv esa bugun — 19 yanvar tunida bo‘lib o‘tadi. Uning doirasida «Atletiko» o‘z maydonida «Eybar»ni qabul qilsa, «Barselona» safarda «Real Sosyedad»ga qarshi saf tortadi.

Ispaniya kubogi, 1/4 final
18 yanvar, chorshanba
«Alkorkon» — «Alaves» 0:2
Gollar: Ibai Gomes, 90 (0:1). Ibai Gomes, 90+4 (0:2).
Chetlatish: Karlos Belvis, 90+1 (Mezbon).

«Real Madrid» — «Selta» 1:2
Gollar: Yago Aspas, 64 (0:1). Marselo, 69 (1:1). Xonni, 70 (1:2).
Real Madrid – Kasilya, Varan, Marselo, Danilo (Benzema, 80), Ramos, Kroos, Kazemiro, Asensio (Morata, 53), Modrich, Vaskes (Kovachich, 71), Ronaldu.
Selta – Alvares, Kabral, Kastro, Malyo, Ronkalya, Radoya, Dias, Ernandes, Vass (Gvidetti, 89), Bongonda (Sisto, 87), Aspas (Gomes, 82).
Ogohlantirishlar: Ramos (6), Dias (42), Ernandes (45).