Osiyo chempionlar ligasida bugun saralashning so‘nggi bosqich o‘yinlari o‘tkaziladi. O‘zbekistonning ikkita klubi guruh bosqichi yo‘llanmasini qo‘lga kiritish uchun maydonga chiqadilar. Har ikkala jamoamiz o‘z o‘yinlarini safarda o‘tkazadi.

"Al-Fath" (Saudiya Arabistoni) - "Nasaf" (O‘zbekiston)
"Nasaf" bir hafta oldin Bahraynning "Al-Hidd" klubini yirik hisobda mag‘lub etib, pley-off bosqichiga chiqqandi. Bu safar Ro‘ziqul Berdiyev shogirdlarini jiddiyroq raqib kutib turibdi. Aslida qarshiliklarning bugungi raqibi hisoblangan "Al-Fath" jamoasi omad tufayli OCHLda qatnashish huquqini qo‘lga kiritdi. O‘tgan mavsumda Saudiya Arabistoni chempionatida 3-o‘rinni egallagan "Al-Ittihod" klubi lisenziyalashtirish bilan bog‘liq muammoga duch kelgani bois, OCHLga qo‘yilmadi. Natijada 4-o‘rinni olgan "Al-Ta’vun" guruh bosqichiga o‘tkazilgan bo‘lsa, 5-o‘rinni olgan "Al-Fath" saralash bosqichida ishtirok etish imkoniyatiga ega bo‘ldi.

Biroq Al-Hasa sharafini himoya qiladigan jamoaning Saudiya Arabistoni chempionatining ushbu mavsumidagi ishlari yurishmayapti. Klub 17ta turdan keyin 14 ochko bilan 12-o‘rinni egallab turibdi (14ta jamoa orasida). Ko‘p narsa "Al-Fath" o‘z oldiga qanday maqsad qo‘yishiga bog‘liq. Jamoa yo milliy chempionatning yuqori divizionida jon saqlab qolish uchun kurashadi yoki OCHL guruh bosqichiga chiqish va uzoqroqqa borishni niyat qiladi. Jamoa bosh murabbiyi Fathi al-Jabal kecha bo‘lib o‘tgan matbuot anjumanida asosiy maqsad ikkinchi variant ekanini ta’kidlab o‘tdi. Har holda hozirgi holatda jamoaga har ikkala musobaqada birdek ishtirok etish og‘irlik qiladi.

"Nasaf" esa guruh bosqichi uchun bugun jiddiy jang qilishiga shubha qilmaymiz. Futbolchilar belgilangan reja asosida tartibli harakat qilsalar, o‘z maqsadlariga albatta erishadilar.

"Al-Fath" - "Nasaf" uchrashuvi Toshkent vaqti bilan 20:00da boshlanadi. Uchrashuv "Sport" kanali orqali to‘g‘ridan-to‘g‘ri translyasiya qilinadi.

"Al-Jaish" (Qatar) - "Bunyodkor" (O‘zbekiston)
Sergey Lushchan jamoasi bugun mavsumdagi ilk rasmiy o‘yinini o‘tkazadi. "Qaldirg‘ochlar"ga Qatarning "Al-Jaish" klubi raqiblik qiladi. Bu klub o‘zbekistonliklar uchun ancha tanish raqibga aylanib qoldi. Bu jamoa safida Sardor Rashidov harakat qilayotganidan xabaringiz bor. OCHLning o‘tgan yilgi mavsumida duhaylliklar "Nasaf" bilan bir guruhda ishtirok etishgandi.

"Al-Jaish" Qatar chempionatining ushbu mavsumini juda yaxshi boshlab, jadvalda peshqadamlik qilayotgandi. Biroq ular asta-sekin o‘z o‘yinlarini susaytirib borishdi. Jamoa so‘nggi 4ta o‘yinda g‘alaba qozona olmadi — 3ta durang, bitta mag‘lubiyat. Natijada "Al-Jaish" hozirda 4-o‘ringa tushib qoldi. Klub 36 ochko to‘plagan holda, peshqadam "Laxviya"dan 13 ochko ortda qolmoqda.

"Al-Jaish" o‘z uyida bo‘ladigan o‘yinda jon-jahdi bilan g‘alaba qozonishga harakat qilishiga shubha yo‘q. "Bunyodkor"ning o‘yini esa mavsumga qay tariqa tayyorgarlik ko‘ra olganiga ko‘p jihatdan bog‘liq.

"Al-Jaish" - "Bunyodkor" uchrashuvi Toshkent vaqti bilan 20:15da boshlanadi. "Sport" kanali mazkur o‘yinni yozib olgan holda kechroq efirga uzatadi.