Осиё чемпионлар лигасида бугун саралашнинг сўнгги босқич ўйинлари ўтказилади. Ўзбекистоннинг иккита клуби гуруҳ босқичи йўлланмасини қўлга киритиш учун майдонга чиқадилар. Ҳар иккала жамоамиз ўз ўйинларини сафарда ўтказади.

"Ал-Фатҳ" (Саудия Арабистони) - "Насаф" (Ўзбекистон)
"Насаф" бир ҳафта олдин Баҳрайннинг "Ал-Ҳидд" клубини йирик ҳисобда мағлуб этиб, плей-офф босқичига чиққанди. Бу сафар Рўзиқул Бердиев шогирдларини жиддийроқ рақиб кутиб турибди. Аслида қаршиликларнинг бугунги рақиби ҳисобланган "Ал-Фатҳ" жамоаси омад туфайли ОЧЛда қатнашиш ҳуқуқини қўлга киритди. Ўтган мавсумда Саудия Арабистони чемпионатида 3-ўринни эгаллаган "Ал-Иттиҳод" клуби лицензиялаштириш билан боғлиқ муаммога дуч келгани боис, ОЧЛга қўйилмади. Натижада 4-ўринни олган "Ал-Таъвун" гуруҳ босқичига ўтказилган бўлса, 5-ўринни олган "Ал-Фатҳ" саралаш босқичида иштирок этиш имкониятига эга бўлди.

Бироқ Ал-Ҳаса шарафини ҳимоя қиладиган жамоанинг Саудия Арабистони чемпионатининг ушбу мавсумидаги ишлари юришмаяпти. Клуб 17та турдан кейин 14 очко билан 12-ўринни эгаллаб турибди (14та жамоа орасида). Кўп нарса "Ал-Фатҳ" ўз олдига қандай мақсад қўйишига боғлиқ. Жамоа ё миллий чемпионатнинг юқори дивизионида жон сақлаб қолиш учун курашади ёки ОЧЛ гуруҳ босқичига чиқиш ва узоқроққа боришни ният қилади. Жамоа бош мураббийи Фатҳи ал-Жабал кеча бўлиб ўтган матбуот анжуманида асосий мақсад иккинчи вариант эканини таъкидлаб ўтди. Ҳар ҳолда ҳозирги ҳолатда жамоага ҳар иккала мусобақада бирдек иштирок этиш оғирлик қилади.

"Насаф" эса гуруҳ босқичи учун бугун жиддий жанг қилишига шубҳа қилмаймиз. Футболчилар белгиланган режа асосида тартибли ҳаракат қилсалар, ўз мақсадларига албатта эришадилар.

"Ал-Фатҳ" - "Насаф" учрашуви Тошкент вақти билан 20:00да бошланади. Учрашув "Спорт" канали орқали тўғридан-тўғри трансляция қилинади.

"Ал-Жаиш" (Қатар) - "Бунёдкор" (Ўзбекистон)
Сергей Лушчан жамоаси бугун мавсумдаги илк расмий ўйинини ўтказади. "Қалдирғочлар"га Қатарнинг "Ал-Жаиш" клуби рақиблик қилади. Бу клуб ўзбекистонликлар учун анча таниш рақибга айланиб қолди. Бу жамоа сафида Сардор Рашидов ҳаракат қилаётганидан хабарингиз бор. ОЧЛнинг ўтган йилги мавсумида дуҳайлликлар "Насаф" билан бир гуруҳда иштирок этишганди.

"Ал-Жаиш" Қатар чемпионатининг ушбу мавсумини жуда яхши бошлаб, жадвалда пешқадамлик қилаётганди. Бироқ улар аста-секин ўз ўйинларини сусайтириб боришди. Жамоа сўнгги 4та ўйинда ғалаба қозона олмади — 3та дуранг, битта мағлубият. Натижада "Ал-Жаиш" ҳозирда 4-ўринга тушиб қолди. Клуб 36 очко тўплаган ҳолда, пешқадам "Лахвия"дан 13 очко ортда қолмоқда.

"Ал-Жаиш" ўз уйида бўладиган ўйинда жон-жаҳди билан ғалаба қозонишга ҳаракат қилишига шубҳа йўқ. "Бунёдкор"нинг ўйини эса мавсумга қай тариқа тайёргарлик кўра олганига кўп жиҳатдан боғлиқ.

"Ал-Жаиш" - "Бунёдкор" учрашуви Тошкент вақти билан 20:15да бошланади. "Спорт" канали мазкур ўйинни ёзиб олган ҳолда кечроқ эфирга узатади.