«Navbahor» mavsumlar oralig‘idagi navbatdagi nazorat uchrashuvini “Qo‘qon-1912” jamoasiga qarshi o‘tkazdi.
“Oq-tepa” o‘yingohida o‘tkazilgan o‘yinda namanganliklar 3:0 hisobida g‘alaba qozonishdi.
Birinchi bo‘limdagi voqealar rivoji asosan maydon markazida kechdi. Tanaffusga yaqin Mansur Saidov raqib himoyachisining xatosidan so‘ng qo‘qonliklar darvozasini nishonga olib hisobni ochdi. Ikkinchi bo‘limda Ro‘zimboy Ahmedov zaxiradan maydonga tushib, “dubl” muallifiga aylandi. Dastlabki golda Ahmedovga Mansur Saidov hammualliflik qildi. Hujumchi ikkinchi golini qarshi hujumda urdi.
Ikkinchi bo‘lim o‘rtalarida futbolchilar maydonda o‘zaro hisob-kitob ishlariga kirishishdi. Oqibatda, uchrashuvni boshqarib borgan Ahror Risqullayev har jamoadan ikki nafardan futbolchini - maydondan chetlatdi.
«Navbahor» uchrashuvni quyidagi tarkibda o‘tkazdi: Asilbek Amanov, Tohir Shamshitdinov, G‘iyos Komilov, Abbos Otaxonov, Alisher Samatov, A’zam Aliyev, Dilshod Jabborov, Mirzohid G‘ofurov, Oybek Qilichev, Mansur Saidov, Nemanya Yovanovich. Zaxiradan maydonga tushganlar: Ro‘zimboy Ahmedov, Azizbek Turg‘unboyev, Jahongir Mehmonov, Timur Tolipov, Ravshan Xursanov, Hasanboy Ergashev, Abduaziz Sultonov, Ilhom Boydedayev, Alisher Mirzayev.
"Qo‘qon-1912" tarkibi: Muzaffar Abdullayev, Ruslan Melziddinov, Bahodir Akramov, Nosir Otaqo‘ziyev, Akmal Xolmurodov, Darko Gojkovich, Bahodir Pardayev, Murod Xolmuhammedov, Aleksandr Merzlyakov, Suhrob Berdiyev, Jalil Kimsanov. Zaxiradan maydonga tushganlar: Oybek Rustamov, Aziz Ashurov, Filip Rayevas, Shohruh Xolmatov.
Navbatdagi nazorat o‘yini 22 fevral kuni Samarqandning "Dinamo" klubiga qarshi o‘tkaziladi.
