«Навбаҳор» мавсумлар оралиғидаги навбатдаги назорат учрашувини “Қўқон-1912” жамоасига қарши ўтказди.

“Оқ-тепа” ўйингоҳида ўтказилган ўйинда наманганликлар 3:0 ҳисобида ғалаба қозонишди.

Биринчи бўлимдаги воқеалар ривожи асосан майдон марказида кечди. Танаффусга яқин Мансур Саидов рақиб ҳимоячисининг хатосидан сўнг қўқонликлар дарвозасини нишонга олиб ҳисобни очди. Иккинчи бўлимда Рўзимбой Аҳмедов захирадан майдонга тушиб, “дубль” муаллифига айланди. Дастлабки голда Аҳмедовга Мансур Саидов ҳаммуаллифлик қилди. Ҳужумчи иккинчи голини қарши ҳужумда урди.

Иккинчи бўлим ўрталарида футболчилар майдонда ўзаро ҳисоб-китоб ишларига киришишди. Оқибатда, учрашувни бошқариб борган Аҳрор Рисқуллаев ҳар жамоадан икки нафардан футболчини - майдондан четлатди.

«Навбаҳор» учрашувни қуйидаги таркибда ўтказди: Асилбек Аманов, Тоҳир Шамшитдинов, Ғиёс Комилов, Аббос Отахонов, Алишер Саматов, Аъзам Алиев, Дилшод Жабборов, Мирзоҳид Ғофуров, Ойбек Қиличев, Мансур Саидов, Неманья Йованович. Захирадан майдонга тушганлар: Рўзимбой Аҳмедов, Азизбек Турғунбоев, Жаҳонгир Меҳмонов, Тимур Толипов, Равшан Хурсанов, Ҳасанбой Эргашев, Абдуазиз Султонов, Илҳом Бойдедаев, Алишер Мирзаев.

"Қўқон-1912" таркиби: Музаффар Абдуллаев, Руслан Мелзиддинов, Баҳодир Акрамов, Носир Отақўзиев, Акмал Холмуродов, Дарко Гожкович, Баҳодир Пардаев, Мурод Холмуҳаммедов, Александр Мерзляков, Суҳроб Бердиев, Жалил Кимсанов. Захирадан майдонга тушганлар: Ойбек Рустамов, Азиз Ашуров, Филип Райевац, Шоҳруҳ Холматов.

Навбатдаги назорат ўйини 22 февраль куни Самарқанднинг "Динамо" клубига қарши ўтказилади.