Ўзбекистон U-20 терма жамоаси ва Португалиянинг “Брага” клуби футболчилари Садриддин Ҳасанов ва Сайфиддин Содиқов илк бор миллий терма жамоа йиғинига жалб этилди. Бу ҳақда клуб матбуот хизмати хабар берди.

Ёш футболчилар сентябрь-октябрь ойларидаги FIFA кунлари доирасида бош мураббий Фабио Каннаваро қўл остида Эрон ва Жанубий Кореяга қарши ўтказиладиган ўртоқлик учрашувларига тайёргарлик кўради.

Ўзбекистон миллий терма жамоаси Эрон билан 24 сентябрь куни Фарғона шаҳрида, Жанубий Кореяга қарши эса 6 октябрь куни сафарда ўртоқлик учрашуви ўтказади. Ушбу учрашувлар 2027 йилги Осиё Кубогига тайёргарлик вазифасини ўтаб беради.

Маълумот учун, ҳар икки ўзбекистонлик футболчи ёзги трансферлар ойнасида ижара асосида Португалиянинг “Брага” клубига қўшилганди.

Уларнинг ижара шартномасида тўлиқ сотиб олиш ҳуқуқи ҳам кўзда тутилган бўлиб, бу сумма Садриддин Ҳасанов учун 250 минг евро (тахминан 3,41 млрд сўм), Сайфиддин Содиқов учун эса 300 минг еврони (тахминан 4,1 млрд сўм) ташкил этади.

Агар Португалия клуби ушбу бандни фаоллаштириб, ўйинчиларни тўлиқ сотиб олса, улар билан 5 йиллик шартнома имзоланади. Бундай ҳолатда “Бунёдкор” ва “Одил Аҳмедов ФА” жамоалари ўз тарбияланувчиларининг келажакдаги ҳар қандай трансферларидан маълум миқдордаги фоиз улушига эга бўлади.