Shaxmat bo‘yicha Respublika ixtisoslashtirilgan bolalar-o‘smirlar sport maktabi sportchilarni moliyaviy qo‘llab-quvvatlash va rag‘batlantirish maqsadida yosh shaxmatchilar uchun stipendiya joriy etdi. Bu haqda maktab Axborot xizmati xabar berdi.

Stipendiya homiy tashkilotlar tomonidan ajratilgan mablag‘lar fondi doirasida Shaxmat bo‘yicha Respublika ixtisoslashtirilgan bolalar-o‘smirlar sport maktabining xalqaro va respublika musobaqalarida yaxshi natijalarga erishgan, ijtimoiy himoyaga muhtoj, yaxshi xulq-odobli o‘quv-mashg‘ulotlar va sport musobaqalarida muntazam ishtirok etadigan sportchi-o‘quvchilariga stipendiya komissiyasi qaroriga asosan to‘lanadi.

Ayni paytda shaxmat bo‘yicha jahon, Osiyo va mamlakat musobaqalari chempion va sovrindorlari bo‘lgan 31 nafar o‘quvchi munosib deb topildi va 100 ming so‘mdan 300 ming so‘mgacha oylik stipendiya sohiblariga aylanishdi. 

Shaxmat maktabining ushbu stipendiyalari mamlakatimizdagi yosh iqtidorli shaxmatchilarning xalqaro va mamlakat turnirlarida ijobiy natijalarni qo‘lga kiritishiga, yoshlar o‘rtasida shaxmatni yanada ommalashtirishga xizmat qiladi.