"Chelsi" bosh murabbiyi Antonio Konte o‘zining chempionlik kurashidagi tajribasi hikoya qildi va chempionlik uchun kerak bo‘ladigan minimal ochkoni aytdi.

"Futbolchilik faoliyatimdan aytishim mumkinki, menda yaxshi va yomon vaziyatlar bo‘lgan. "Lasio" oxirgi 6-7 o‘yinda yetti yoki sakkiz ochko ortda borayotib, bizni quvib yetgandi va biz "Perudja" bilan o‘yinda chempionlikni boy bergandik. Men jamoa sardori edim va buni juda yaxshi eslayman.

Shu o‘yindan so‘ng men terma jamoa bilan Yevroga otlanishim kerak edi. Men 6 tundan buyon uxlay olmayotgan edim, chunki chempionlikn bunday tarzda boy berish haqiqiy shok edi.

Boshqa bir vaziyatda esa men jamoam bilan sakkiz ochko ortda borayotib, chempion bo‘lganman. Biz oxirgi o‘yinda "Udineze"ni yutgan edik, "Inter" esa "Lasio"ga mag‘lub bo‘lgandi.

Men doim o‘z o‘yinchilarimga hali oldinda 13 o‘yin borligi va 39 ochko uchun kurashish kerakligini ta’kidlab kelyapman. Chempionligimiz haqida gapirishga hali erta. Biz diqqat-e’tiborli bo‘lib, qadamma qadam odimlashimiz kerak. Ishonamanki, chempionlik uchun yana 32 ochko yetarli bo‘ladi", - deydi Konte.