Bundan biroz vaqt oldin Namangandagi “Markaziy” o‘yingohning majlislar zalida 2017 yilgi chempionatda jamoamiz sharafini himoya qiladigan futbolchilarning taqdimot marosimi bo‘lib o‘tdi, deya xabar beradi jamoa rasmiy sayti.
Taqdimot marosimida O‘zbekiston Respublikasi Oliy Majlis Senati a’zosi, Namangan viloyat hokimi, viloyat futbol federasiyasi prezidenti Xayrulla Xayitboyevich Bozarov, Namangan shahar hokimi, «Navbahor» futbol klubi prezidenti Bahodir Mamatovich Bekxodjayev, “Navbahor” futbol klubi vise-prezidenti Akramjon Gapparovich Dedabayev, klub rahbariyati, “Navbahor” jamoasi murabbiylar shtabi, asosiy tarkib a’zolari hamda “Navbahor” jamoasining bir guruh ishqibozlari ishtirok etishdi.
Taqdimot marosimini Namangan viloyat futbol federasiyasi vise-prezidenti Bahrom Xolmirzayev ochib berdi. Shundan so‘ng Namangan viloyat hokimi, viloyat futbol federasiyasi prezidenti Xayrullo Bozarov so‘zga chiqib, jamoa futbolchilari oldida turgan mas’uliyatli vazifa xususida fikr yuritdi. Shu bilan birgalikda Bozarov o‘z so‘zida “Navbahor” jamoasini O‘zbekiston chempionatlari o‘tkazila boshlagandan beri oliy ligada muntazam ravishda qatnashib kelayotgan uchta jamoadan biri ekanligini ham alohida e’tirof etdi. Shuningdek, viloyat rahbari bugungi kunda futbolchi va murabbiylar uchun barcha shart-sharoitlarni yaratib berilayotganligi ham aytib o‘tib, murabbiy va futbolchilarga yuqori marrani ko‘zlagan holda chempionatda faqat sovrinli o‘rinlar uchun kurashish va “Navbahor” jamoasining avvalgi shon-shuhratini tiklash vazifasini qo‘ydi. Bu borada jamoa a’zolariga omad yor bo‘lishiga tilak bildirdi.
Shundan so‘ng mavsumlar oralig‘ida “Navbahor” jamoasi tarkibidan joy olgan futbolchilarni tanishtirish marosimi o‘tkazildi. Mavsum arafasida “Navbahor” a’zosiga aylangan futbolchilarga o‘yin formalari topshirildi. Unga ko‘ra darvozabonlar Amanov Asilbek 30, Ortiqov Akmal 1, Ashurmatov Nodirjon 12, himoyachilar Mehmonov Jahongir 32, Samatov Alisher 2, Ergashev Hasanboy 3, Stanoyevich Darko 44, Otaxonov Abbos 4, Komilov G‘iyosjon 5, yarim himoyachilar Xursanov Ravshanbek 8, Mirzayev Alisher 20, Saidov Mansur 10, Qilichev Oybek 7, G‘ofurov Mirzohid 19, hujumchilar Yovanovich Nemanya 84, Sultanov Abduaziz 11, Ahmedov Ro‘zimbay 22 va Talipov Timur 95-raqamda harakat qiladigan bo‘ldilar.
Tadbir davomida “Navbahor” jamoasi bosh murabbiy Ilhom Mo‘minjonov so‘zga chiqdi: - Jamoamiz joriy yilgi mavsumga tayyorgarlikni asosiy qismini Toshkentda olib bordi. Mavsumga munosib tarzda tayyorgarlik ko‘rishimiz va tarkibni shakllantirishda Xayrulla Hayitbayevich Bozarov boshchiligidagi viloyat rahbariyati zarur shart-sharoitlarni yaratib berishdi. Yangi mavsumda viloyat rahbariyati va muxlislar tomonidan bildirilgan ishonchni oqlash uchun harakat qilamiz. Ishqibozlarimizning munosib tarzda qo‘llab-quvvatlashlariga ishongan holda maydonga chiqib, viloyat ahlini xursand qilish uchun bor kuch va imkoniyatimizni ishga solamiz.
Bosh murabbiydan keyin jamoa sardori Dilshod Jabborov futbolchilar nomidan so‘zga chiqdi: - Jamoamizni mavsumga munosib tarzda tayyorgarlik ko‘rishi uchun barcha shart-sharoitlarni yaratib berilgani uchun jamoamiz a’zolari nomidan minnatdorchilik bildirib o‘taman. 2017 yilgi chempionatda oldimizga qo‘yilgan vazifani bajarish uchun qo‘limizdan kelganicha harakat qilib, jamoamiz muxlislarini xursand qilishga harakat qilamiz. Bildirilgan ishonchga maydondagi mazmunli o‘yinlarimiz orqali javob berish uchun bor kuch va imkoniyatimizni ishga solamiz.
