"Navbahor" - "Obod" (2:1) uchrashuvidan keyingi matbuot anjumanida "Navbahor" bosh murabbiyi Ilhom Mo‘minjonov ishtirok etdi.

"Bugungi o‘yinni og‘ir kechishini bilgandik. Chempionatning birinchi o‘yini bo‘lgani va mavsum arafasida tarkib deyarli yangilanganligi sababli buni taxmin qilgandik. Futbolchilarimiz 12 mingdan oshiq muxlis qarshisida to‘p surishgani uchun ham bahsning birinchi bo‘limida biroz xayojonlanishdi. Shunday bo‘lsada, jamoamizning tanaffusdan keyin namoyish etgan o‘yini manzur bo‘ldi. Faqatgina uchrashuv yakunida bo‘shashishgani sababli o‘z darvozamizdan to‘p olib chiqishga majbur bo‘ldik. Ko‘rsatilgan o‘yin uchun yigitlarga rahmat aytaman. Ular g‘alaba uchun bor kuch va mahoratlarini ishga solgan holda harakat qilishdi. So‘nggi besh kun davomida “Obod” jamoasining o‘yinini o‘rganib chiqdik. Raqibning “Sho‘rtan”ga qarshi so‘nggi uchrashuvini ham ko‘rib chiqdik. Bugun maydonga g‘uzorliklarga qarshi bahsdagi tarkib tushdi. Shundan kelib chiqqan holda ikkinchi golni urganimizdan keyin uch hujumchi bilan harakat qilishga qaror qildik. Bu hol tez orada o‘z samarasini berishi kerak edi. Ammo, Ro‘zimboy Ahmedov juda qulay vaziyatdan foydalana olmadi. Nazarimda hujumchi bunday holatda gol urishi shart edi. Agarda uchinchi golni urganimizda tashabbus to‘liq qo‘limizda bo‘lardi. Shunga qaramay ikkinchi bo‘limni hujumkor ruhda o‘tkaza oldik. “Obod” jamoasi bugungi kunda yaxshi shakllangan klublar sirasiga kiradi. Asosiysi birinchi o‘yinda g‘alabani qo‘lga kiritdik. Bahs oxirlarida himoyachilarimiz bo‘shashishmaganida, darvozamiz daxlsizligini ta’minlagan bo‘lardik. Afsuski o‘sha paytda darvozabonimizga ham ziyraklik yetishmadi. Himoyachining o‘rniga hujumchini tushirib, raqibga yanada bosim o‘tkazishni maqsad qilgandik. Ro‘zimboy Ahmedov jamoamizdagi yetakchi hujumchilardan biri sanaladi. Aynan uni maydonga tushirish orqali o‘z maydonimizda o‘zimiz xo‘jayin ekanligimizni bildirishni ko‘zlagandik. Ammo, o‘ylagan rejamiz amalga oshmadi. Turg‘unboyevdan ham ko‘p narsani kutgandik. Ushbu futbolchimiz qishki yig‘in paytida o‘zini yaxshi tomondan ko‘rsata olgandi. Lekin, bugun o‘zining yaxshi tomonlarini namoyish eta olmadi. Keyingi o‘yinlarda Azizbek xato va kamchiliklardan to‘g‘ri xulosa chiqargan holda yorqin o‘yinlar namoyish etadi degan umiddaman. Darvozabonlar bilan ishlash uchun mahalliy murabbiylardan biri Ilhom Abduqodirovni jamoaga jalb etdik. Yaqin kunlar ichida bu borada bir to‘xtamga kelamiz. Bugungi uchrashuvda “Obod” tarkibida harakat qilgan Shohruz Norxonovni alohida e’tirof etgan bo‘lrdim. Jamoamiz safida esa Alisher Samatov o‘zini ko‘rsatdi. Aslini olganda barcha munosib tarzda to‘p surdi. Shunga qaramay, Samatovga alohida minnatdorchilik bildirib o‘taman" - dedi Mo‘minjonov.