"Barsa" ko‘z o‘ngimizda tarix yaratdi. To‘g‘risini tan olaman, hattoki o‘zim ham chorak finalga yo‘l olishlariga ishonmagan edim. Ishonolmasdim, 4:0, 5:0 hisobidagi kambeklarni O‘zbekiston MTJ va "Paxtakor" ishtirokida ko‘rganmiz yaqin tarixda, albatta. Ammo, "Barselona" ishtirokida, bo‘lib ham Yevropa Chempionlar ligasida unday yo‘l bilan g‘alaba qozonish mumkinligiga ishonolmasdim. Trapning 1-daqiqada qizil olishini tasavvur qilib ko‘ring-a!)
Kecha tvit ham yozdim: Agar "Barselona" muvozanatni to‘liq tiklaganda va 4:0 hisobini o‘rnatganda va shundan keyin Kavani bitta javob to‘pi kiritganida, balkim, "Barselona" sochilib ketgan bo‘lardi. Lekin o‘sha golgacha uchta gol urishni eplagan "Barsa" keyin yana 3 ta gol kirita oldi. O‘sha taxlitda, faqat Neymar didjey bo‘lgan "time lapse" rejimida.
Xullas, "qalovini topsang qor ham yonadi", deganlaridek, "Barselona" qorni yondirdi. Ana endi klubdan ham katta bo‘lgan jamoa mavsumdagi barcha sovrinlarni qo‘lga kiritish uchun juda yaxshi imkoniyat hosil qilib turibdi. "Barselona" hamon jahon futbol po‘rtanasining qoq markazida, kerak bo‘lsa - o‘sha po‘rtananing aylanish tezligini belgilab beruvchi kuch bo‘lib turibdi. Hali bizni oldinda juda qiziq uchrashuvlar kutmoqda. Ko‘raveramiz.
Shuhrat SHOKIRJONOV,
jurnalist
