Bugun tunda ko‘plab futbol muxlislarining nigohi London shahridagi “Stemford Bridj” stadioniga qaratiladi. Unda Angliya Kubogining 1/4 finalidan o‘rin olgan “Chelsi” va “Manchester Yunayted” klublari maydonga tushishadi.

“Tumanli albion”ning eng nomdor klublari hisoblanadigan mazkur jamoalar qarama qarshiligi chorak final bosqichiga yakun yasab beradi. Mazkur bosqichdan o‘rin olgan 3ta bahsdan so‘ng “Manchester Siti”, “Tottenhem” va “Arsenal” klublari keyingi bosqich yo‘llanmasiga ega bo‘lib ulgurishdi.

Mankunianliklar so‘nggi marotaba 1999 yilda “aristokratlar”ni mag‘lubiyatga uchrata olishgan va shundan buyon hali londonliklar mag‘lubiyatga uchrashmagan. Mazkur uchrashuvda ham bu seriya davom etishi ehtimoli borgan sari oshib bormoqda. Sababi, “Manchester Yunayted” ushbu uchrashuvda bir yo‘la to‘rtta hujumchisi hizmatidan foydalana olmaydi: Zlatan Ibrahimovich uchta o‘yinga diskvalifikasiya qilingan bo‘lsa, Antoni Marsyal jarohat sabab bu o‘yinda maydonga tushmaydi. Markus Reshford esa betob. Bu ham yetmaganidek Ueyn Runi mashg‘ulot jarayonida himoyachi Fil Jons bilan to‘qnashuv oqibatida oyog‘idan jarohat ortirib olgan.

Londonliklar safida esa jiddiy yo‘qotishlar yo‘q. O‘yin soat 00:45da boshlanadi.