Ayni payt ijara kelishuviga muvofiq, turli klublarda tajriba oshirayotgan futbolchilardan ayrimlari yaqin orada «Chelsi»ga qaytib, asosiy tarkibdagi joyga dangal da’vo qilishlari mumkin. Mana, Viktor Mozes yaqinda londonliklar bilan 2 yillik shartnoma tuzdi. Bu uning asosiy tarkib o‘yinchisi maqomini olganiga yakuniy dalildir. Vaholanki, nigeriyalik futbolchi avvalgi mavsum «Vest Xem»da ijara shartnomasini o‘tagan va doimiy ravishda asosiy tarkibdan joy olish masalasi ancha qiynalgandi. Umuman, bu yigit naq 3 yillik muhlat ichida «Chelsi»ning loaqal bitta rasmiy o‘yinida ham ishtirok etmagandi. Bosh murabbiylik vakolati Antonio Konte ixtiyoriga berilganidan keyin nigeriyalikning tarkibga kirishi tugul, klubda qolishiga ham ishonch past edi. Qarangki, voqealar mutlaqo boshqacha rivojlandi: Mozes mavsumlar oralig‘idagi yig‘inlarda shu qadar yorqin taassurot uyg‘otdiki, italyan mutaxassisi unga maydonda alohida rol topshirishni paysalga solgani yo‘q. Mana, Viktor oktyabr oyidan buyon birorta o‘yinni o‘tkazib yubormadi va muhimi, londonliklarning ijobiy natijalariga sezilarli ulush qo‘shmoqda. Ha, oxirgi vaqtlarda ertaknamo tarixlar APL uchun odatiy holdek bo‘lib qoldi. Xo‘sh, yana kimlar Viktor Mozes yo‘lini takrorlash imkoniyatiga egalar. Ma’lumotlarga ko‘ra, hozirda «Chelsi»ning naq 37 nafar futbolchisi ijara kelishuvi bo‘yicha boshqa klublarda to‘p surmoqda. Tabiiyki, ulardan ayrimlari keyingi mavsumdayoq «ko‘klar» safiga qaytishlari mumkin.
Keysi Palmer
«Xaddersfild Taun» joriy mavsum APL yo‘llanmasini yutishdan umidvor. Bu jamoa ayni payt chempionship turnir jadvalida 3-o‘rinni egallab turibdi. «Xaddersfild» xususan, «Chelsi»dan taklif etilgan Palmerga katta ishonch bilan qarayapti. 20 yoshli hujumchi ortda qolgan 7 oy ichida bu ishonchni to‘la oqladi. Deylik, 5ta gol urishdan tashqari, yana 3tasiga assistentlik qildi. Uning fevral oyi boshidan buyon jarohat sabab, maydonga tusholmayotganini ham qo‘shimcha ma’lumot sifatida keltirish joiz. Ha, Keysi safdan chiqmaganida, statistikasi yanada yaxshi bo‘larmidi? U maydonda aqlga tayanib o‘ynashi bilan ajralib turadi. Ko‘plab uchrashuvlarda «Xaddersfild»ning qanday harakatlanishini belgilab bergani esa, yigitcha yetakchilik xususiyatidan bebahra qolmaganidan dalolat. Eng asosiysi, u juda yosh va hali barcha xususiyatlarini yanada mukammallashtirish imkoniyatiga ega. Taxmin qilish mumkinki, Palmer ham Kontening «Chelsi»si o‘yiniga bemalol moslashishga qodir. To‘g‘ri, asosiy tarkibdan joy olishda keskin raqobatga duch kelishi ta-yin.
Izzi Braun
Palmer avgust oyidayoq «Xadder-sfild» uy stadioni tribunalari yoqimtoyiga aylangan bo‘lsa, Izzi Braun «teryerlar» safiga yanvarda qo‘shildi. U bungacha «Roterxem» ro‘yxatida edi, biroq bu klubda o‘zini mutlaqo begona sezdi. Ya’ni tarkibidan joy ololmadi. Qolaversa, «Roterxem»ning ishlari sira yurishmadi - oxirgi pog‘onalarda yurdi. Braunning maydondagi o‘xshovsiz harakatlariga qarab, yana bir iqtidor «ochilmay turib, so‘nishi»ni bashorat qilishdi. Lekin futbolchi «Xaddersfild»ga o‘tishi hamono barchasini keskin o‘zgartirdi. Qisqasi, boshqa saviyadagi futbolchilar davrasiga tushgan Izzi darhol yog‘du tarata boshladi va jamoa hujumida barqarorlik ramziga aylandi. Harqalay, «Chelsi»dan kelgan jamoadoshidan ortda qolmasligini isbotlayapti. Qisqa vaqt ichida 11 marta maydonga tushgan Brauning 4ta gol urgani o‘zgarish ko‘lamini ko‘rsatib turibdi. U xususan, «Lids»ga qarshi derbi o‘yinida ham o‘z nomiga aniq zarba yozib qo‘ydi. Braun qaysidir ma’noda benazir futbolchilar sirasiga kiradi. U bo‘ydor va baquvvat, shuning barobarida juda chaqqon, texnik salohiyati mukammal. Yana to‘pga bir teginishdayoq vaziyatni keskinlashtirishga urinishi maqtovga loyiq. Xullas, Izzi zamonaviy «Chelsi»ga ideal darajada mos keladi. Aytgancha, londonlik muxlislar bu yigit haqida eshitib ulgurishdi va undan ko‘p narsa kutishyapti.
Temmi Abraxam
Hujumchi saviyasini nimalar asosida to‘g‘ri baholash mumkin? Tushunarliki, avvalo, uning statistik ko‘rsatkichlariga qarash kerak. Demak, muddaoga o‘tsak, Temmi Abraxam joriy mavsum «Bristol Siti» uchun naq 21ta gol urishga ulgurdi va shu natijasining o‘zi ko‘p narsani anglatadi. Shubhasiz, Abraxamning «Eshton Geyt» stadioniga ijara safari juda omadli bo‘ldi. Yangi klubidagi debyut o‘yinini gol bilan bezagan hujumchi hamon to‘xtayotgani yo‘q. Umuman, gap chempionship-2016|2017ning bosh yulduzlaridan biri haqida ketmoqda. Uning faolligi boshqa yigitlarga ilhom bag‘ishlayotgandir. Abraxam ayni payt mavsum-2014|2015da «Midlsbro» safida porlagan Patrik Bemfordni eslatyapti. U hattoki, yaxshiroq ham. «Chelsi»ning doimiy ravishda jiddiy goleadorga ehtiyoj sezmoqda va hamma yozda asosiy hujumchi rolida yangi futbolchi ko‘rmoqchi. Lekin kimgadir million-million sarflash shart emas, axir Abraxamdek tayyor hujumchi bor.
Andreas Kristensen
Futbol birgina hujumdan iborat emas va «Chelsi» himoyani ham muntazam kuchaytirib borishi shart. To‘g‘ri, jamoaning orqa chizig‘i joriy mavsum a’lo darajada ishlayapti. Ammo kimdir safdan chiqqudek bo‘lsa, muammolar yuzaga kelishi hech gap emas. Qolaversa, «Chelsi»ning bu safar yevrokuboklardan chetda ekanligini unutmaslik kerak. Shunday ekan, keyingi mavsumda zaxira kuchlariga ehtiyoj sezilishi tayin. Menxengladbaxning «Borussiya»sida 2 yil o‘ynagan Andreas Kristensen esa «Chelsi» himoyasiga nomzodlardan biridir. Harqalay, u jiddiy jamoada yetarlicha tajriba to‘pladi va o‘zi ham Londonga qaytish ilinjida. Muhimi, alohida iqtidori borligini allaqachon isbotlagan Andreas aynan Konte qadrlaydigan ko‘plab xususiyatlarga ega. U aqlli, o‘yinni nozik ilg‘aydi, me’yor darajasida tajovuzkor va havo kurashida Gari Keyxill yoki Sesar Aspilikuetadan kam emas. Kristensen Germaniyada uyaltirib qo‘ymadi va endi «Chelsi» himoyani kuchaytirishga ajratilgan mablag‘ni tejashi mumkin.
Lyuis Beyker
«Chelsi» rahbariyati tomonidan ijara asosida boshqa jamoalarga yuborilgan futbolchilar orasida Beyker bilan tenglashadigani topilmasa kerak. Angliyalik yigit Gollandiya eredivizionidagi 2 yillik faoliyati davomida «Vitess»ning muhim futbolchisiga aylandi. U - katta klublarda o‘z o‘rnini topish salohiyatiga ega ajoyib yarim himoyachi. Deylik, xuddi Sesk Fabregas kabi himoyani mustahkamlashi ham, hujumga rang-baranglik olib kirishi ham mumkin. Zero, o‘yin holati va standart vaziyatdan gol urishni birdek qoyillatadi. Hattoki, hozirgi «Chelsi»da bunday xususiyatlarga ega o‘yinchilar ko‘p emas. 21 yoshli yarim himoyachida universallik ham binoyidek: markazda (misol uchun, N~Gole Kante bilan) yoki oldinroqda (Diyego Kosta bilan) harakatlanishi mumkin. Ijara kelishuvi Beykerning o‘sishiga katta yordam berdi. Lekin Gollandiyada uning qiladigan ishi qolmadi. Boshqacha aytsak, 2 yil ichida yuqorilashga munosibligini to‘la-to‘kis isbotladi. «Chelsi» kech bo‘lmasidan buni tan olishi kerak. Aks holda, qaysidir chaqqon klub Beykerni ilib ketishi hech gap emas...
