O‘zbekiston Kubogi doirasidagi "Andijon" - "Neftchi" (1:1, pen. 3:5) bahsidan so‘ng farg‘onaliklar ustozi Andrey Fyodorov jurnalistlar savollariga javob qaytardi.

- Bugun o‘zimiz istagandek o‘yin ko‘rsata olmadik. Nafaqat "Neftchi"ning balki "Andijon"ning o‘yini ham qovushmadi. Chunki maydonning holati yaxshi emas edi. Shu sababli uzun paslar orqali o‘yin tashkil qildik. Ketma-ket "derbi"larni o‘tkazyapmiz. Bugungi bahsda ko‘proq himoyada tartibli harakat qilib, hujumdagi imkoniyatlardan unumli foydalanishga urg‘u berdik. Muzaffarovning chetlatishidan so‘ng durang natijani ushlab qolishga va vaziyatni penaltilargacha olib borishga harakat qildik. Chunki bir kishi kam bo‘lib qolgandik. Penaltilar seriyasida esa omad biz tarafda bo‘ldi. G‘alabadan xursandman. Muxlislarni ham mazkur muvaffaqiyat bilan tabriklayman. Stadionda bizni Farg‘onadan kelib qo‘llab-quvvatlagan muxlislarga shuningdek yosh futbolchi muxlislarimizga ham rahmat deb qolaman.
Sherzod Hakimovda kichik jarohat bor edi. Hamza Karimov esa ma’lum sabablarga ko‘ra tayyorgarlik jarayoniga kech qo‘shildi. Shu sababli mazkur futbolchilar bahsni o‘tkazib yuborishdi. Yana bir bor aytib o‘taman, bunday maydonda yaxshi va sifatli futbol ko‘rsatish qiyin, - dedi Fyodorov.