Oliy liganing 5-turidan o‘rin olgan “Sho‘rtan” – “Lokomotiv” (2:0) uchrashuvidan so‘ng mehmonlar bosh murabbiyi Andrey Miklyayev o‘z fikrlarini bildirib o‘tdi.
"Bugungi uchrashuvdan afsusdamiz. Yigitlarimiz yaxshi o‘ynashdi. Bugungi uchrashuv faqat bir jamoaning hujumlari ostida o‘tadigan o‘yinlar sirasidan bo‘ldi. Juda ko‘p imkoniyatlarni yaratdik ammo ularni samarali yakunlay olmadik. Raqibimizning darvozaboni ajoyib o‘yin namoyish etdi. Ko‘p vaziyatlarda jamoani qutqarib qoldi. Ammo futbolda, “sen urmasang, senga urishadi” degan naql bor va biz bunga bugun yana bir bor guvoh bo‘ldik. Talaygina imkoniyatlarga ega bo‘lib, ularni amalga oshirolmaslik va bundan ortiq o‘z darvozamizdan ham gol o‘tkazish juda achinarli va ayanchli bo‘ldi.
Bizga bugun omad yetishmadi. Yigitlardan gina qilish, yoki ayblash noo‘rin. Sababi ular bugun ajoyib o‘ynashdi, harakat qilishdi. Bugun bizning kunimiz emas ekan. O‘z o‘rnida “Sho‘rtan” jamoasini bugungi g‘alaba bilan tabriklayman. Ularda g‘alabaga bo‘lgan ishtiyoq, tashnalik kuchli bo‘ldi shekilli, ular unga erishdi.
Raqibni nazar-pisand qilmaslikdan yiroqmiz. Yuqorida aytib o‘tganimdek biz bugun yomon o‘ynamadik, aksincha omad “Sho‘rtan” tomonda bo‘ldi" - dedi Miklyayev.
