Oliy ligadan o‘rin olgan “Neftchi” – “Bunyodkor” (1:2) uchrashuvidan keyingi matbuot anjumanida farg‘onaliklar ustozi ishtirok etdi.

"Birinchi bo‘limdagi hatti-harakatlarimizni futbol deyish qiyin. Raqib deyarli barcha jabhalarda bizdan ustunlik qildi. Mag‘lubiyatning qandaydir aniq sababini izohlay olmayman. Negadir uchrashuvlarga ruhan tayyorlana olmayapmiz. Mashg‘ulotlarni kuzatsangiz hammasi yaxshidek, biroq rasmiy uchrashuvlarda yigitlarni tanib bo‘lmayapti. Men ishonamanki, tarkibimizdagi yigitlar bundan-da kuchli o‘yin ko‘rsatishga qodirlar va buni albatta isbotlaydilar. O‘tgan yilgi mavsumning oxirgi uchrashuvlari va joriy chempionat startidagi omadsizliklarni o‘z bo‘ynimga olaman. Farg‘ona futbolining imkoniyatlari yomon emas. Qandaydir choralar ko‘rilishi kerakka o‘xshaydi. Uchrashuv yakunlanishiga 20 daqiqacha vaqt qolganida o‘zimga-o‘zim xulosa qildim. Agar meni ketishim jamoaga ijobiy natijalarni qaytarsa, iste’fo berishga tayyorman" - dedi Andrey Fyodorov.