«Yuventus» himoyachisi Dani Alves Chempionlar ligasida sobiq jamoasi «Barselona»ni ortda qoldirganiga izoh berdi.

«Juda qiyin o‘yinni o‘tkazdik, jamoadoshlarim uchun xursandman. Bu kechadagi quvonch achchiq va alamli bo‘ldi. Chunki ancha yillar davomida o‘ynagan stadionga qaytdim, xotiralar meni chulg‘ab oldi. Bundan tashqari, do‘stlarimning g‘amga botganini ko‘rib, o‘zim ham qayg‘urdim.

Nima ham qilardik, bu kasbimizga xos bo‘lgan holat. O‘yindan so‘ng, shu gaplar bilan Neymarni yupatdim. Avval «Barselona»ga duch kelishni istamayman deb ko‘p gapirardim, biroq bunday holatlarda hissiyotlarni maydon tashqarisida qoldirgan ma’qul» - dedi Alves.