6 aprelda e’lon qilingan FIFA reytingida JCH-2018 mezboni Rossiya O‘zbekiston milliy terma jamoasidan keyingi 61-o‘rinni egallab turibdi bu esa Rossiya terma jamoasining shaxsiy antirekordi hisoblanadi.

Xalqaro futbol federasiyalari assosiasiyasi (FIFA) reytingini hisob-kitob qilish tizimi Jahon chempionatiga mezbonlik qiluvchi davlatlarga nisbatan o‘zgartirilishi mumkin. FIFAning musobaqalar o‘tkazish ishlari bo‘yicha direktori Kolin Smit jurnalistlarga shunday degan.

FIFAning aprel reytingida Rossiya 61-o‘ringa tushib, o‘z antirekordini takrorlagan. Rossiya terma jamoasi 2018 yilgi Jahon chempionati mezboni sifatida jahon birinchiligining saralash uchrashuvlaridan ozod qilingan. Rasmiy o‘yinlar esa o‘rtoqlik uchrashuvlariga nisbatan kattaroq koeffisiyent bilan baholanadi. Reyting tuzilayotganida terma jamoalarning rasmiy va o‘rtoqlik uchrashuvlarida erishgan natijalari hisobga olinadi. 4 yil muqaddam JCH-2014 mezboni — Braziliya ham shu vaj bilan FIFA reytingining kuchli o‘nligini tark etgan edi.

“Bu tizim 10 yildan buyon o‘zgarishlarsiz ishlatib kelinmoqda. Biz doimo bu masalani muhokama qilayapmiz va kelajakda reytingni takomillashtirish ustida yana bosh qotiramiz. Balkim aynan Jahon chempionati mezboni borasida biror o‘zgarishlar kiritish kerakdir», — degan Smit.

JCH-2018 kelgusi yilning 14 iyunidan 15 iyuliga qadar Rossiyaning 11 shahrida joylashgan 12 ta stadionda tashkillashtiriladi.