Rim derbisida «Lasio» klubidan uchralgan (1:3) mag‘lubiyat «Roma» muxlislarini darg‘azab qilgan ko‘rinadi.
4 may kuni kechqurun Rim aholisi Kolizey yaqinidagi ko‘priklardan birida g‘aroyib tomoshaning guvohi bo‘lishdi. Unga «Roma» yetakchilari Daniele De Rossi, Raja Naynggolan va Muhammad Saloh futbolkasi kiydirilgan qo‘g‘irchoqlar osib ketilgandi. Katta bannerda esa: «Bir maslahat: chiroqni o‘chirmasdan uxlanglar» - degan tahdidli so‘zlar yozilgan edi.
Katta ehtimol bilan, bu jamoaning qoniqarsiz natijalaridan norozi bo‘lgan fanatlarning ishi bo‘lishi mumkin. Ammo polisiya bunda «Lasio» muxlislarining ham qo‘li borligini gumon qilmoqda.
Marca xabariga ko‘ra, huquq tartibot idora xodimlari bu ish yuzasidan surishtiruvni boshlagan.
