Рим дербисида «Лацио» клубидан учралган (1:3) мағлубият «Рома» мухлисларини дарғазаб қилган кўринади.
4 май куни кечқурун Рим аҳолиси Колизей яқинидаги кўприклардан бирида ғаройиб томошанинг гувоҳи бўлишди. Унга «Рома» етакчилари Даниэле Де Росси, Ража Найнгголан ва Муҳаммад Салоҳ футболкаси кийдирилган қўғирчоқлар осиб кетилганди. Катта баннерда эса: «Бир маслаҳат: чироқни ўчирмасдан ухланглар» - деган таҳдидли сўзлар ёзилган эди.
Катта эҳтимол билан, бу жамоанинг қониқарсиз натижаларидан норози бўлган фанатларнинг иши бўлиши мумкин. Аммо полиция бунда «Лацио» мухлисларининг ҳам қўли борлигини гумон қилмоқда.
Marca хабарига кўра, ҳуқуқ тартибот идора ходимлари бу иш юзасидан суриштирувни бошлаган.
