«Барселона» клуби янги марказий ҳимоячи излашда давом этмоқда. Каталония грандининг асосий нишони сифатида ҳамон Миланнинг «Интер» клуби аъзоси Алессандро Бастони кўрилмоқда, бироқ унинг нархи жуда баландлиги сабабли трансферни амалга ошириш осон бўлмайди.

Diario Sport нашрининг маълумотларига кўра, «кўк-анорранглилар»да италиялик футболчи бўйича музокаралар муваффақиятсиз якунланган тақдирда «Б режаси» мавжуд: муқобил вариант сифатида «Тоттенхэм» сардори Кристиан Ромеро белгиланган. Аргентиналик футболчи Ла Лигада тўп тепишдан хурсанд бўлишини бир неча бор таъкидлаб ўтган. Бундан ташқари, агар «шпорлар» Премьер-лигани тарк этадиган бўлса, 28 ёшли футболчини анча арзон нархга қўлга киритиш имконияти туғилиши мумкин. Transfermarkt портали Ромеронинг қийматини 50 миллион еврога баҳоламоқда.