“Al-Ayn” – “Bunyodkor” uchrashuvi oldidan tashkil etilgan matbuot anjumanining ikkinchi qismida amirliklar ishtirok etishdi.

Bosh murabbiy Zoran Mamichga himoyachi Said Juma hamroxlik qildi.

- Bizni qiziqarli uchrashuv kutib turibdi. Maqsadimiz guruh bosqichini birinchi o‘rinda yakunlash. Shu boisdan ham ertangi bahsda uch ochko uchun kurashamiz. “Bunyodkor” xavfli raqib. ULardan har narsa kutsa bo‘ladi. Oddiy misol, o‘tgan turda “Al-Ahli” jazolandi. Biz xotirjamlikka berilmoqchi emasmiz. Men yoshlarga ishonishda davom etaman. Ular jamoaning ertasi. Ertaga ham ba’zi yangi nomlar maydonga tushishi mumkin. Bu so‘nggi mashg‘ulotdan keyin aniqlab olamiz. Ichki chempionat bilan Osiyo Chempionlar ligasini taqqoslamagan bo‘lardim. Ikkala musobaqa tamomila boshqacha turnirdir. BAA chempionatida omadimiz chopmayapti. Lekin eng yaxshi o‘yinlarimizni Chempionlar ligasida namoyish etyapmiz. O‘ylaymanki, har ikkala musobaqadagi harakatlarimizni yuqori saviyaga olib chiqamiz, - deydi Zoran Mamich.

- “Bunyodkor” yaxshi va kuchli jamoa. Ular Toshkentdagi bahsda bizga tashvish tug‘dirishgandi. Qolaversa, avvalgi turda guruh favoritlaridan biri bo‘lmish “Al-Ahli” klubini yengishdi. Bu ham raqib oddiy jamoa emasligini ko‘rsatib turibdi. Biz o‘z muxlislarimiz ko‘z o‘ngida o‘ynaymiz va ularga g‘alaba taqdim etmoqchimiz, - deydi Said Juma.