Ayni damda Angliya Premyer ligasida birinchi va ikkinchi o‘rinlar qaysi klubga nasib qilishi aniq bo‘lsa-da, hali shiddatlilik pasaygani yo‘q. Sababi, YECHLga yo‘llanma beruvchi 4-o‘rin uchun “Liverpul” va “Arsenal” o‘rtasida qizg’in kurash kechishi aniq. Chempionat tugashiga bir tur qolganida “Liverpul”da 73, “Arsenal”da esa 72 ochko mavjud.

“LIVERPUL” — 70 FOIZ

Ha, Yurgen Klopp shogirdlarining YECHLga yo‘llanma olish imkoniyati Arsen Vengerning shogirdlarinikidan anchagina katta. Birinchidan, “Liverpul” so‘nggi tur o‘yinida g’alaba qozonsa bo‘ldi, marra uniki. So‘nggi turda esa “mersisaydliklar” “Midlsbro”ni qabul qilishadi. “Midlsbro” qanday natija ko‘rsatishidan qat’iy nazar Chempionshipga tushib ketishi aniq, boisi jamoa ayni damda 28 ochko to‘plagan, 17-o‘rindagi “Suonsi”da esa 38 ochko bor. Demakki, “Midlsbro” oxirgi o‘yinda shunchaki muxlislar uchun maydonga tushadi. Yoz navbatida bu “Liverpul” uchun qiyinchilik tug’dirishi mumkin, boisi “Midlsbro” ortiqcha bosimsiz o‘ynaydi va ishqibozlarini quvontirish uchun bor kuchini ishga soladi, yo‘qotadigan narsasi yo‘q. Biroq “Liverpul” uchun qulay tomoni hamma narsa o‘z qo‘lida.

“ARSENAL” — 30 FOIZ

“Arsenal”ning imkoniyati kamligini quyidagicha izohlash mumkin — uning to‘rtinchi o‘rinni egallashi faqat o‘ziga bog’liq emas. Arsen Venger shogirdlari so‘nggi turda “Everton”ga qarshi bahs yuritishadi. Birinchidan, “Everton” osonlikcha mag’lub bo‘lmaydi, ikkinchidan “Arsenal” g’alaba qozongan taqdirda ham “Liverpul” ochko yo‘qotmasa, foydasi yo‘q. Mantiqan olib qaraganda esa g’alaba qozonish uchun “Arsenal”dan ko‘ra “Liverpul”da imkoniyat ko‘proq. Ammo kim biladi deysiz, ehtimol, “Liverpul” “Midlsbro” bilan durang o‘ynab, “Arsenal” esa “Everton”ni yutib, 4-o‘rinni olishi mumkin. Bu futbol, biz esa hozircha voqealar rivojini kuzatib boramiz.