“Lokomotiv” Oliy Liga 11-tur uchrashuvlari doirasida “Qo‘qon-1912” jamoasi mehmoni bo‘ldi.

Anchagina shiddatli ruhda kechgan bellashuv 1:1 hisobidagi durang bilan nihoyasiga yetdi.

Diqqatga sazovor jihati shundaki, kechagi uchrashuvda “Lokomotiv”ning yagona goliga jamoa hujumchisi Marat Bikmayev mualliflik qildi. Mazkur gol tajribali futbolchi uchun joriy yilgi chempionatimiz doirasida 11-si bo‘ldi. Ayni paytda Oliy Liga to‘purarlar bahsida yakka peshqadamlik qilayotgan futbolchimiz hozirga qadar o‘tkazilgan 10 ta o‘yinning 9 tasida raqiblari darvozasini ishg‘ol etdi. Faqatgina “Sho‘rtan”ga qarshi kechgan bellashuvda Marat maydonni golsiz tark etishga majbur bo‘ldi.

Yana bir diqqatga sazovor jihat shundan iboratki, Marat Bikmayev hozircha “Lokomotiv” gol urgan har bir uchrashuvda o‘z nomini tabloga yozdirib qo‘yishga muvaffaq bo‘lmoqda. U 11 ta golning 4 tasini penaltidan kiritishga muvaffaq bo‘ldi.

Shuningdek, “Lokomotiv” safida o‘ynayotgan Jaloliddin Masharipov ham to‘purarlar poygasida yetakchilar qatorida bormoqda. Mahoratli futbolchi hisobida hozircha kiritilgan 5 ta gol mavjud. U shularning bittasini 11 metrli jarimadan kiritgan.

Yana bir tajribali futbolchi Sardor Mirzayev esa 3 bora raqiblari darvozabonlarini hafa qilishga erishdi. Murod Bobojonov hamda Ikrom Aliboyev hisobida 2 tadan gol mavjud. Temur Kapadze, Islom To‘xtaxo‘jayev kabi o‘yinchilar bu yil hozircha bir martadan o‘z nomini tabloga yozidirib qo‘yishga erishishdi.

Yana bir jihat “Lokomotiv” ishqibozlarini xushnud etishi turgan gap. Jamoamiz hozirda milliy chempionatimizda eng sermahsul o‘yin namoyish etayotgan jamoa bo‘lib turibdi. Qolaversa, eng kam gol o‘tkazib yuborgan klub ham – aynan “Lokomotiv”dir. To‘plar nisbati bugunga kelib 25-7 ko‘rinish olgan.