Yevropa Chempionlar ligasining yarim final bosqichida Italiyaning «Yuventus» va Fransiyaning «Monako» klublari o‘zaro to‘qnash kelishdi.
Mazkur o‘yinlarda ikki futbolchi — italyanlardan Janluiji Buffon, fransuzlardan esa Kilian Mbappe alohida ajralib turdi. Eng qizig‘i, aynan shu ikki futbolchiga oid shunday qiziqarli statistikalar bor ekanki, ularni o‘qib, ayni damda ular bir davrda o‘ynayotganiga ham ishonmaysiz. Masalan, Buffon Mbappedan 20 yilu 326 kunlik katta. Quyidagi faktlar esa bundan ham qiziqroq.
Janluiji Buffon Mbappe tug‘ilgunga qadar Italiya A seriyasida 82 ta o‘yin o‘tkazgan. Ularning 36 tasida darvozasi dahlsizligini saqlab qolgan.
Shuningdek, Mbappe tug‘ilguncha Buffon professional faoliyatida 107 ta o‘yinda maydonga tushgan. Shulardan 44 tasida raqiblar uni dog‘da qoldira olishmagan.
Mbappe tug‘ilgunga qadar Janluiji Italiya terma jamoasi safida uch bor harakat qilgan. Qolaversa, 1998 yilgi jahon chempionatida Italiya terma jamoasi tarkibiga kiritilgan.
Mbappe tug‘ilgunga qadar Buffon UYEFA Chempionlar ligasi va UYEFA kubogi sohibiga aylangan. Shu bilan birga, Italiya chempionatida kumush medallarga egalik qilgan.
Nihoyat, Mbappe tug‘ilgunga qadar Buffon 21 yoshgacha bo‘lgan futbolchilar o‘rtasidagi jahon chempionatida g‘oliblik shohsupasiga ko‘tarilgan.
Futbolchilar nima deydi?
Janluiji Buffon:
— Mbappe 1998 yilda tug‘ilgan, men esa bu vaqtda terma jamoa tarkibida jahon chempionatida ishtirok etishga ulgurgandim. Bilasizmi, men juda baxtliman. Chunki 1950-1960 yillarda tug‘ilgan futbolchilar bilan faoliyatingni boshlash va 2000 yilda tavallud topgan futbolchilarga qarshi harakat qilib, faoliyatingni yakunlash — bu juda ajoyib va quvonchli holat. Men aynan ana shunday baxtga erishyapman.
Kilian Mbappe:
— Buffon dunyo futboli tarixida chuqur iz qoldirgan eng kuchli darvozabonlardan biri. Men unga qarshi harakat qilganimdan mamnunman. Ayni damda har kuni Buffon va unga o‘xshash futbolchilarni mag‘lub etish uchun o‘z ustimda tinimsiz ishlayapman. So‘z beraman, agar yana imkoniyat tug‘ilsa, Buffonning darvozasiga gol kiritish uchun qo‘limdan kelgan hamma narsani qilaman va buning uddasidan chiqaman.
Ma’lumot uchun, Mbappe Buffonning darvozasiga gol urishni uddaladi.
