Mana, Oliy liga birinchi davrasi ham asta-sekin yakuni sari yaqinlashmoqda. Mavsum ekvatori ko‘ringani sari o‘yinlar shiddati yanada oshyapti. Hozirdan mavsum kashfiyoti sifatida ta’riflanayotgan «Qo‘qon-1912», shuningdek, «Navbahor» kabi jamoalarning maqsadi chindan ham, jiddiy ko‘rinadi.
Aksincha, mavsum omadsizlari qatoriga tushib qolgan «Bunyodkor» va «Paxtakor» vakillari haligacha o‘zlarini o‘nglay olishmadi. E’tiborga molik tomoni, 11-tur doirasida shu ikki klub o‘zaro to‘qnash keldi.
«Bunyodkor» stadionida kechgan o‘yinda kuchlar teng keldi - 1:1. Demakki, har ikki jamoa ochko yo‘qotdi. «Qaldirg‘ochlar» himoyachisi Akrom Komilovni suhbatga chorlab, bosh murabbiy o‘zgargani jamoa muhitiga qanday ta’sir qilgani bilan qiziqdik.
- Akrom, navbatdagi «Toshkent derbisi» o‘z nomiga yarasha shiddatli kechdi. Avvalo, uchrashuv haqidagi shaxsiy xulosalaringiz bilan o‘rtoqlashsangiz...
- Ha, ikki jamoa futbolchilari ham tomoshabop o‘yin ko‘rsatishga intilishdi. Har tomonlama derbiga xos kurash. Biz birinchi bo‘limda ancha faol harakatlandik, ammo tanaffusdan keyingi 20 daqiqa davomida o‘zimizga umuman o‘xshamadik. Faqat raqib gol urganidan so‘ng qayta uyg‘ondik, go‘yo. Aslida bemalol g‘alaba qozonishimiz mumkin edi. Afsuski, ba’zi vaziyatlarda omadimiz chopmadi. Shu o‘rinda bir gapni alohida aytishim kerak, o‘yindan o‘yinga yaxshiroq to‘p suryapmiz. O‘ylaymanki, endi hammasi ijobiy tomonga o‘zgaradi.
- Darhaqiqat, ikkinchi bo‘limni juda bo‘sh boshlab, tashabbusni raqibga berib qo‘ydinglar. Nima, tanaffus chog‘i murabbiylar qarshi hujumdan foydalanish bo‘yicha ko‘rsatma berishdimi?
- Yo‘q. Murabbiylar xuddi birinchi bo‘limdagi kabi hujumkor ruhda o‘ynash zarurligini uqtirishdi. Biroq ma’lum vaqt negadir oldinga o‘tolmadik. Bu charchoqqa bog‘liqmi? Menimcha, yo‘q. Axir gol qo‘yib yuborgach, yana hujumga otlandik va ko‘plab vaziyatlarni yuzaga keltirdik. Afsuski, shu pallalarda ozgina sovuqqonlik yetishmadi.
- Umuman, durang o‘yinga mos natijami?
- Qaytaraman, g‘alabaga haqliroq edik.
- Mirjalol Qosimov bosh murabbiy sifatida qaytgach, jamoa muhitida qanday o‘zgarishlar sezilmoqda?
- Futbolchilarda o‘z kuchlariga ishonch hissi qayta nish urdi. Hozirda har bir o‘yinda so‘nggi soniyalargacha faqat g‘alaba haqida o‘ylayapmiz. To‘g‘ri, ayni payt natija masalasida ishlarimiz yaxshi emas. Lekin bu vaqtinchalik holat, menimcha.
- Mashg‘ulotlar jarayoni va taktika borasida ham yangiliklar bormi?
- Ha, albatta. O‘yin uslubida ham, ishga yondashuvda ham o‘zgarishlar katta. Shu ruhda ishlasak, hammasi avvalgidek o‘z iziga tushishiga ishonaman.
- Muxlislar «Bunyodkor»ni hech qachon turnir jadvali quyi qismida ko‘rishmagandi. Jamoa qanaqasiga shunday holatga tushib qoldi? Buning sabablarini tahlil qildinglarmi?
- Birinchi navbatda, omad bizdan yuz o‘girmoqda. Chunonchi, har bir uchrashuvda kamida 5-6ta golga tortadigan vaziyatni yuzaga keltiryapmiz. Ammo samara yo‘q, bu aynan omadsizlik belgisi bo‘lsa kerak.
- Xo‘sh, avvalgi o‘yinlardagi salbiy natijalar uchun kim ko‘proq aybdor - futbolchilarmi yoki murabbiylar?
- Tan olish kerak, ko‘plab yigitlar o‘yinida yaqqol pasayish kuzatildi. Shaxsan o‘zim ham avvalgidek o‘ynay olmadim. Endi imkon qadar tezroq o‘zimni tiklab olishim shart. Murabbiy doimo to‘g‘ri yo‘l ko‘rsatadi. Qolaversa, u maydonga tushmaydi. Shunday ekan, aybni murabbiyga to‘nkash to‘g‘ri emas. Natija yaxshilanishi uchun har bir futbolchi jon kuydirib o‘ynashi kerak.
- Bugungi o‘yinga qaytamiz: gol qo‘yib yuborilishiga sabab bo‘lgan qoida buzilishida sizga ikkinchi sariq kartochka ko‘rsatilishi hech gap emasdi. «Paxtakor» gol urgach, o‘zingizni aybdordek his qilgandirsiz...
- Ha, albatta. Lekin o‘sha vaziyat sariq kartochkaga tortmasdi. Umuman, hamisha xato va kamchiliklarimni obdon tahlil qilaman va mashg‘ulotlarda bu borada astoydil ishlayman. O‘ylaymanki, Mirjalol Qo‘shoqovich qo‘l ostida yanada o‘sishga erishaman.
- Mirjalol Qosimovning futbolchilar bilan alohida jiddiy gaplashib olgani aniq. Sir bo‘lmasa, murabbiy asosan qanday talablarni qo‘ydi?
- Birinchi navbatda, yagona maqsad yo‘lida birlashishimiz shartligini uqtirib, aks holda, hech vaqoga erishib bo‘lmasligini aytdi. Albatta, ahillikda gap katta. Shunday taqdirdagina har qanday raqibni yengish mumkin.
- Vaziyatga real baho berib aytingchi, «Bunyodkor» bu yil sovrinli o‘rinlar uchun kurashga qayta oladimi?
- Hammasi o‘z qo‘limizda. Vaziyatni o‘zgartirish uchun hali vaqt bor va umid qilamanki, bu ish uddasidan chiqamiz.
- «Bunyodkor» ishtirokidagi har bir o‘yindan keyingi matbuot anjumanida «yosh futbolchilar» iborasi ishlatilardi. Biroq birinchidan, 22-23 yoshli futbolchiga bu ta’rifni qo‘llayverish uncha to‘g‘ri kelmaydi. Ikkinchidan, u shu yoshda o‘ynamasa, qachon o‘ynaydi? Bu borada fikringiz qanday?
- Ha, gapingizga qo‘shilaman. Lekin jamoamiz Osiyo bo‘yicha eng yosh tarkibga ega va buni tan olish kerak. Yo‘q, bu bilan o‘zimizni oqlamoqchi emasman. Zero, hali yosh ekanliklari aytilayotgan futbolchilar 2-3 yildan buyon asosiy tarkibda o‘ynashyapti. Yana takror aytaman, «Bunyodkor» hali chempionat va kubok bahslarida o‘z so‘zini aytadi. Nasib qilsa, Mirjalol Qosimov boshchiligida jamoaning yangi tarixini yaratamiz. Fursatdan foydalanib, muxlislardan oxirigacha bizga ishonishlarini so‘rardim. Ishonchni hali oqlaymiz, albatta.
