“Lokomotiv” futbolchilariga milliy terma jamoa o‘yinlari sabab Oliy Ligada yuzaga kelgan tanaffus munosabati bilan 5 kunlik qisqa ta’til berilgandi.

Jamoa vakillari ushbu ta’tilda ham “bo‘sh o‘tirishgani” yo‘q. Kecha “Loko” futbolchilari Respublika onkologiya ilmiy markazida davolanayotgan bolalarni bayram bilan tabriklagani borishgandi. Bugun esa bir qator futbolchilar va murabbiylar shtabi Toshkentda joylashgan Britaniya maktabida bo‘lib, u yerda ta’lim olayotgan yigit-qizlar bilan maroqli suhbat qurishdi.

Dastlab ushbu maktab o‘quvchilari bilan uchrashuv bo‘lib o‘tdi. Uchrashuv avvalida Toshkentdagi Britaniya maktabining ikki nafar o‘quvchisi “Lokomotiv” jamoasi haqida tayyorlagan taqdimot namoyish etildi. So‘ngra jamoada faoliyat olib borayotgan avstraliyalik mutaxassis Mirko Yelichich hamda bir necha nafar futbolchilar o‘quvchilarning ingliz tilida bergan turli mavzudagi savollariga javob qaytarishdi.

Keyin esa maktabning futbol maydonchasida o‘quvchilar hamda “Lokomotiv” futbolchilari o‘rtasida ko‘rgazmali futbol o‘yini o‘tkazildi. O‘yin juda qiziqarli tarzda o‘tdi. Yakunda esa Toshkentdagi Britaniya maktabi o‘quvchilari taniqli futbolchilarimizdan esdalik uchun dastxat olishdi.