“Локомотив” футболчиларига миллий терма жамоа ўйинлари сабаб Олий Лигада юзага келган танаффус муносабати билан 5 кунлик қисқа таътил берилганди.
Жамоа вакиллари ушбу таътилда ҳам “бўш ўтиришгани” йўқ. Кеча “Локо” футболчилари Республика онкология илмий марказида даволанаётган болаларни байрам билан табриклагани боришганди. Бугун эса бир қатор футболчилар ва мураббийлар штаби Тошкентда жойлашган Британия мактабида бўлиб, у ерда таълим олаётган йигит-қизлар билан мароқли суҳбат қуришди.
Дастлаб ушбу мактаб ўқувчилари билан учрашув бўлиб ўтди. Учрашув аввалида Тошкентдаги Британия мактабининг икки нафар ўқувчиси “Локомотив” жамоаси ҳақида тайёрлаган тақдимот намойиш этилди. Сўнгра жамоада фаолият олиб бораётган австралиялик мутахассис Мирко Йеличич ҳамда бир неча нафар футболчилар ўқувчиларнинг инглиз тилида берган турли мавзудаги саволларига жавоб қайтаришди.
Кейин эса мактабнинг футбол майдончасида ўқувчилар ҳамда “Локомотив” футболчилари ўртасида кўргазмали футбол ўйини ўтказилди. Ўйин жуда қизиқарли тарзда ўтди. Якунда эса Тошкентдаги Британия мактаби ўқувчилари таниқли футболчиларимиздан эсдалик учун дастхат олишди.
