Саудия Арабистонининг “Ан-Насср” клубининг 41 ёшли ҳужумчиси Криштиану Роналду бош мураббий Жорже Жезус ўз лавозимида қолар экан, Португалия миллий терма жамоасида бошқа ўйнамоқчи эмас. CNN Португал журналисти Руи Сантушнинг хабар беришича, футболчи ҳамда мураббий ўртасидаги муносабатлар энди яхши томонга ўзгармайди.

Хабарларга кўра, Роналду фақатгина Жорже Жезус истеъфога чиқарилган тақдирдагина Португалия терма жамоасига қайтади. Акс ҳолда, футболчи миллий жамоа либосини бошқа киймоқчи эмас.

Эслатиб ўтамиз, томонлар ўртасидаги келишмовчиликнинг Миллатлар Лигаси доирасида Норвегияга қарши (2:1) кечган учрашувда бошланди. Роналду ушбу баҳсда тўлиқ 90 дақиқа захирада қолдирилди ва бу футболчининг кескин эътирозига сабаб бўлган. Оқибатда ҳужумчи Данияга қарши ўтказилган навбатдаги учрашув (4:2) олдидан жамоавий машғулотларда иштирок этишдан бош тортган ва кўп ўтмай терма жамоа ихтиёрини бутунлай тарк этган.

Вазиятни янада чигаллаштирган ҳолат — мураббийнинг матбуот анжуманидаги кескин баёноти бўлди. Қайд этилишича, Роналду Жорже Жезуснинг ўйиндан кейинги интервюсида айтган гапларидан қаттиқ ранжиган. Мураббий ўз навбатида футболчининг жамоани бойкот қилгани юзасидан изоҳ бераркан, қабул қилган қарорлари учун ҳеч кимдан узр сўрамоқчи эмаслигини таъкидлаган.