Qatar terma jamoasi bosh murabbiyi Xorxe Fossati JCH-2018 saralashida Janubiy Koreya (3:2) ustidan qozonilgan tarixiy g‘alabadan so‘ng, kutilmaganda o‘z lavozimidan bo‘shatishlarini so‘rab ariza yozdi.
64 yashar mutaxassisning bunday qarorga kelish sabablari ochiqlanmayapti, rasmiy ravishda u hali lavozimidan ozod etilgani ham yo‘q.
Qatar futbol Assosiasiyasi ham bunday qarordan taajjublanmoqda va murabbiy bilan uchrashuvdan keyingina qaror chiqarishini bildirmoqda.
Ta’kidlash lozimki, urugvaylik Fossati Qatar terma jamoasini o‘tgan yilning sentyabr oyidan beri boshqarib kelayotgan edi. Uning boshchiligida jamoa jahon chempionati saralash bosqichida 2 ta g‘alaba, 1 ta durang va 3 ta mag‘lubiyatga uchradi va finalga chiqish imkoniyatini hali ham saqlab turibdi.
Fossati avval 2007-2008 yillarda ham Qatar milliy terma jamoasini boshqargan, Qatarning "Ar-Rayyan" klubi bilan mamlakat chempionligini nishonlagan edi.
Qatar saralash bosqichida Suriya (mehmonda) va Xitoy (uyda) bilan o‘yinlarni o‘tkazishi kerak.
