Қатар терма жамоаси бош мураббийи Хорхе Фоссати ЖЧ-2018 саралашида Жанубий Корея (3:2) устидан қозонилган тарихий ғалабадан сўнг, кутилмаганда ўз лавозимидан бўшатишларини сўраб ариза ёзди.

64 яшар мутахассиснинг бундай қарорга келиш сабаблари очиқланмаяпти, расмий равишда у ҳали лавозимидан озод этилгани ҳам йўқ. 

Қатар футбол Ассоциацияси ҳам бундай қарордан таажжубланмоқда ва мураббий билан учрашувдан кейингина қарор чиқаришини билдирмоқда. 

Таъкидлаш лозимки, уругвайлик Фоссати Қатар терма жамоасини ўтган йилнинг сентябрь ойидан бери бошқариб келаётган эди. Унинг бошчилигида жамоа жаҳон чемпионати саралаш босқичида  2 та ғалаба, 1 та дуранг ва 3 та мағлубиятга учради ва финалга чиқиш имкониятини ҳали ҳам сақлаб турибди.

Фоссати аввал 2007-2008 йилларда ҳам Қатар миллий терма жамоасини бошқарган, Қатарнинг "Ар-Райян" клуби билан мамлакат чемпионлигини нишонлаган эди.   

Қатар саралаш босқичида Сурия (меҳмонда) ва Хитой (уйда) билан ўйинларни ўтказиши керак.