Bugun “Nasaf” Oliy liga 14-turida “Paxtakor” jamoasi bilan kuch sinashadi.
Jamoalar Oliy ligadagi o‘zaro 41-uchrashuvida maydonga tushishadi.
O‘yin “Paxtakor” markaziy stadionida soat 19:00da boshlanadi. Bizga ma’lum bo‘lishicha, uchrashuv televideniya orqali jonli namoyish etilmaydi. O‘yin 22:20da “Sport” telekanali orqali yozib olingan holda ko‘rsatiladi.
“Nasaf” bu yil O‘zbekiston chempionatidagi 21-ishtirokini davom ettirmoqda. Jamoaning bugungi uchrashuvi oliy ligadagi 601-o‘yini sifatida tarix sahifasidan joy oladi. Jamoa bosh murabbiyi Ro‘ziqul Berdiyev faoliyati davomida o‘z shogirdlarini, chempionatda 134-marta maydonga boshlab tushadi.
Bugungi uchrashuvni FIFA referisi – Valentin Kovalenko boshchiligidagi hakamlar guruhi boshqaradi. Ushbu hakam joriy chempionatda hanuzgacha bu jamoalar ishtirokidagi o‘yinni boshqarmagan. Valentin Kovalenkoga bugungi bahsda A.Rasulov va J.Saidovlar qanotlarda yordam berishadi. Uchrashuvning zaxira hakami etib A. Lupashko tayinlangan. Hakamlar ishini bugun F.Abdullayev nazorat qiladi.
Mazkur uchrashuvga bo‘lgan qiziqish doimgidek juda yuqori. Bunga sabablar talaygina. Mazkur jamoalar mamlakati chempionatida prinsipial raqiblar hisoblanishadi. Jamoalar har bir uchrashuvda muxlislarga hayajonli va murosasiz kurashlarga boy uchrashuvlarni taqdim etib kelishgan. Bugun ham muxlislar ajoyib futbol o‘yiniga guvoh bo‘lishlariga shubha qilmasa ham bo‘ladi.
Quyidagi faktlar ham bugungi uchrashuvning nufuziga dalolat qilib turibdi. Ushbu jamoalar Toshkentda 20 marta chempionat uchrashuvlarida o‘zaro tuqnash kelishgan. Shularning 16tasida “Paxtakor jamoasi g‘alaba qozongan, “Nasaf” esa 1 marta, 2001 yili g‘alabaga erishgan, qolgan 3 uchrashuvda murosa ko‘chasi tanlangan. “Paxtakor” so‘nggi bor o‘z maydonida “Nasaf”ni 2015 yili mag‘lub etgan.
Bugun “Nasaf” 16 yillik natijasini takror eta oladimi yoki “Paxtakor” 2 yillik natijasini qayd eta oladimi?
Bu yilgi chempionatda mazkur jamoalarning ishtiroki ham boshqacha kechmoqda. “Paxtakor” shu paytgacha 13ta uchrashuvdan keyin 18 ochko to‘plab, 8-o‘rinda borayotgan bo‘lsa, “Nasaf” 12ta uchrashuvdan so‘ng 23 ochko bilan 2-pog‘onani band etib turibdi.
