Oliy Liga peshqadami “Lokomotiv” 30 iyun kuni 3-turning qoldirilgan o‘yinida “Metallurg” bilan bellashadi.

Qayd etish joizki, ushbu ikki jamoa shu paytga qadar Oliy Ligada 24 bor o‘zaro to‘qnash kelishgan bo‘lib, yaqqol ustunlik “Lokomotiv” futbolchilari tomonida. Poytaxtliklar o‘yinlarning 14 tasida g‘alabaga erishgan bo‘lsa, bekobodliklar o‘zaro bellashuvlarning 3 tasinigina o‘z foydalariga hal eta olishgan. Yana 7 ta bahsda g‘olib aniqlanmagan – durang.

Raqib darvozasini ishg‘ol etish bobida ham ustunlik “Loko” vakillari tarafida bo‘lib turibdi. “Temiryo‘lchilar” shu paytga qadar 46 bor “Metallurg” darvozasiga yo‘l topa bilishgan hamda 19 marta o‘z darvozalaridan to‘p o‘tkazib yuborishgan.

“Lokomotiv”ning “Metallurg” ustidan qozongan eng yirik hisobdagi g‘alabasi – 5:1 bo‘lib, bunday hisobda toshkentliklar ikki bor g‘alabaga erishgan (2012 va 2014 yillarda). Shuningdek, 2013 yilda “Loko” vakillari bekobodliklarni safarda 4 ta to‘p farqi bilan mag‘lub etishni uddalashgandi.

Shu o‘rinda ta’kidlash joizki, Bekobod jamoasi “Lokomotiv”ni 3 bor mag‘lub etgan va shu o‘yinlarning barchasida 1:0 hisobi qayd etilgan. So‘nggi bor “Metallurg” “Lokomotiv” ustidan 2010 yilda g‘alaba qozonishni uddalagan.