Nihoyat, Chili hamda Germaniya o‘rtasidagi Konfederatsiyalar kubogi finali ham yakunlandi. Mazkur bahsda Yoaxim Lyovning tajriba to‘plash uchun olib kelgan “quyonchalari” g‘alaba qozondi. Ha, ko‘pchilik kutmagan holda Germaniyaning ikkinchi tarkibi Chilining asosiy o‘yinchilarini mag‘lub etishdi. Ha, o‘sha “Arsenal” safida Angliyani titratib yurgan Sanches ham, “Bavariya”da Germaniya qiroliga aylangan Vidal ham Germaniya termasining yigitchalari oldida ip esholmay qolishdi.
CHILI O‘Z BOSHIGA O‘ZI YETDI
Ha, Chili o‘z boshiga o‘zi yetdi. Nemislar yagona gollarini aynan chililik futbolchilarning xatosidan so‘ng kiritishdi. Keyin esa himoyani mustahkamlashdi. Chili yomon o‘ynadi deb ayta olmaymiz, hatto kutilganidan-da yaxshi o‘ynadi. Lekin shu kuni Sanches va uning jamoadoshlariga omad kulib boqmadi.
HAMMASI LYOVNING MEHNATI
Bejizga o‘yindan oldin chiqqan rasmda Yoaxim Lyovning o‘zi Chili futbolchilariga qarshi qilib ko‘rsatilmagandi. Shu kuni Lyovning tajribasi Germaniyaning yosh futbolchilariga yetib ortdi. Hatto nemislar yirikroq hisobda ham zafar quchishlari mumkin edi, biroq Bravo ko‘p hollarda Chilining joniga ora kirdi. Xullas, nemislar yana bir marta butun dunyoni hayratga solishdi.
