Ниҳоят, Чили ҳамда Германия ўртасидаги Конфедерациялар кубоги финали ҳам якунланди. Мазкур баҳсда Йоахим Лёвнинг тажриба тўплаш учун олиб келган “қуёнчалари” ғалаба қозонди. Ҳа, кўпчилик кутмаган ҳолда Германиянинг иккинчи таркиби Чилининг асосий ўйинчиларини мағлуб этишди. Ҳа, ўша “Арсенал” сафида Англияни титратиб юрган Санчес ҳам, “Бавария”да Германия қиролига айланган Видал ҳам Германия термасининг йигитчалари олдида ип эшолмай қолишди.
ЧИЛИ ЎЗ БОШИГА ЎЗИ ЕТДИ
Ҳа, Чили ўз бошига ўзи етди. Немислар ягона голларини айнан чилилик футболчиларнинг хатосидан сўнг киритишди. Кейин эса ҳимояни мустаҳкамлашди. Чили ёмон ўйнади деб айта олмаймиз, ҳатто кутилганидан-да яхши ўйнади. Лекин шу куни Санчес ва унинг жамоадошларига омад кулиб боқмади.
ҲАММАСИ ЛЁВНИНГ МЕҲНАТИ
Бежизга ўйиндан олдин чиққан расмда Йоахим Лёвнинг ўзи Чили футболчиларига қарши қилиб кўрсатилмаганди. Шу куни Лёвнинг тажрибаси Германиянинг ёш футболчиларига етиб ортди. Ҳатто немислар йирикроқ ҳисобда ҳам зафар қучишлари мумкин эди, бироқ Браво кўп ҳолларда Чилининг жонига ора кирди. Хуллас, немислар яна бир марта бутун дунёни ҳайратга солишди.
