Futbol sifati nuqtai-nazaridan yuqori baholangan Konfederasiyalar kubogi turnirda muxlislar tashrifi chakki bo‘lmagani qiziqish darajasini ko‘rsatib turibdi. Chunonchi, KK-2017 o‘yinlarini jami 628304 muxlis bevosita stadionlarda kuzatdi. Bu turnir tarixidagi uchinchi yaxshi ko‘rsatkichdir.
- Germaniya termasi Konfederasiyalar kubogini jahon chempioni maqomida qo‘lga kiritgan ilk jamoaga aylandi. Bungacha amaldagi JCH g‘olibiga bu turnirda bosh sovrin yutish nasib etmagandi.
- Bundestim ustozi Yoaxim Lyov futbol tarixida ham jahon chempionati, ham Konfederasiyalar kubogida zafar quchgan to‘rtinchi mutaxassis bo‘ldi. Yoggidan tashqari, Mario Zagallo, Karlos Alberto Perreyra va Luiz Felipe Skolari Braziliya termasini har ikki turnir shohsupasiga yetaklashgani bilan maqtanishlari mumkin.
- Germaniya termasi - o‘z tarixida jahon va Yevropa chempionati hamda Konfederasiyalar kubogida g‘alaba qozongan ikkinchi jamoadir. Fransiya milliy jamoasi ham shunday «xet-trik»ka ega.
- Chili terma jamoasi vakili Klaudio Bravo KK-2017ning eng yaxshi darvozaboni sifatida tan olindi. 34 yoshli kiper guruh bosqichidagi ilk 2ta o‘yinni salomatligiga bog‘liq muammo tufayli o‘tkazib yuborgandi. Keyingi 3ta bahsda esa atigi 2ta gol qo‘yib yubordi.
- Turnirning «Oltin butsa»si g‘olib jamoa hujumchisi Timo Vernerga nasib etdi. 23 yoshli futbolchi musobaqa davomida 3ta gol urdi. Aslida uning jamoadoshlari Lars Shtindl va Leon Goreska ham raqiblar darvozasini 3 martadan ishg‘ol qilishdi, ammo Vernerga yana 2ta golga assistentlik qilgani qo‘l keldi.
- Turnirning barcha uchrashuvlarida ishtirok etib, nemis jamoasini g‘alabalar sari yetaklagan 23 yoshli Yulian Draksler «Oltin to‘p» sovrinini qo‘lga kiritdi. Avvalgi Konfederasiyalar kubogi musobaqalarida Denilson, Ronaldinyo, Rober Pires, Tyerri Anri, Adriano, Kaka va Neymar eng yaxshi futbolchi maqomini olishgandi.
- JCH va KK tarixida ilk marta o‘yinning qo‘shimcha bo‘limlarida ikki nafar futbolchi maydondan chetlashtirildi. 3-o‘rin uchun kechgan Portugaliya - Meksika uchrashuvining 106-daqiqasida Nelson Semedu xavfli o‘yin uchun 2-marta ogohlantirildi va portugallar o‘n kishi bo‘lib qolishdi. Yana 6 daqiqadan so‘ng esa Elizeuning ko‘kragiga oyoq bilan zarba bergan Raul Ximenes ham maydonni ertaroq tark etdi.
- Portugaliya termasi o‘z tarixida ilk marta Konfederasiyalar kubogi sovrindoriga aylandi. Jamoa 3-o‘rin uchun kechgan bahsda Krishtianu Ronaldusiz ham o‘z maqsadiga erishdi - 2:1.
- Chili va Germaniya termasi o‘rtasidagi final o‘yinini «Sankt-Peterburg» arenasida 57268 muxlis tomosha qildi. Bu Konfederasiyalar kubogi-2017da kuzatilgan eng yuqori ko‘rsatkichdir.
- Final o‘yinida Chili termasi himoyachisi Gonsalo Xara raqibi - nemislar hujumchisi Timo Verner boshiga tirsagi bilan og‘riqli zarba berdi. Bu holatda uchrashuvni boshqarib borgan Milorad Majich videoassistentlar yordamiga ehtiyoj sezdi. Yakunda Xaraning qo‘polligi sariq kartochkaga munosib ko‘rildi.
