“Lokomotiv” jamoasi davralar oralig‘idagi tanaffusdan unumli foydalanish hamda Oliy Liganing ikkinchi davrasiga munosib hozirlik ko‘rish maqsadida Belarus poytaxti Minsk shahrida o‘quv-mashg‘ulot yig‘inini boshladi.
Jamoa Minskda 21 iyulga qadar mashg‘ulotlar olib boradi. Ushbu yig‘in davomida 3 ta nazorat bellashuvi o‘tkazish ham ko‘zda tutilgan. Unga ko‘ra, “Temiryo‘lchilar” 14 iyul kuni Mogilyov shahrining “Dnepr” jamoasiga qarshi bahs yuritishadi. Ikkinchi nazorat o‘yini esa 16 iyulda Minskning “Dinamo” jamoasiga qarshi bo‘ladi. So‘nggi match esa 18 iyulda “Slusk” klubiga qarshi o‘tishi belgilangan.
Ta’kidlash joizki, har uchala raqib ham Belarus yuqori ligasi ishtirokchilari sanaladi. “Dinamo Minsk” Belarus chempionatida 3-pog‘onada borayotgan bo‘lsa, “Slusk” 4-o‘rinni egallab turibdi. “Dnepr” esa 16 jamoa orasida 11-o‘rinda ketmoqda.
