Buyuk Britaniya poytaxti London 10 kun davomida para-atletika bo‘yicha Jahon chempionatiga mezbonlik qildi.

Unda 7 nafar o‘zbekistonlik sportchi ishtirok etdi. Ular O‘zbekiston delegasiyasiga 7 ta medal olib berdi. Shularning 3 tasi oltin bo‘lsa, 4 tasi kumush. Bundan 7 sportchidan 5 nafariga shohsupaga chiqish nasib qilganini ko‘rish mumkin.

Oltin

Aleksandr Svechnikov — nayza uloqtirish (jahon rekordi)

Doniyor Soliyev — uzunlikka sakrash (Osiyo rekordi)

Xusniddin Norbekov — disk uloqtirish

Kumush

Sofiya Burxonova — disk uloqtirish

Sofiya Burxonova — yadro uloqtirish

Nozima Qayumova — nayza uloqtirish

Xusniddin Norbekov — yadro uloqtirish

O‘zbekistonlik sportchilardan Aleksandr Svechnikov va Doniyor Soliyev rekord o‘rnatishga ham muvaffaq bo‘ldi.

Soliyev uzunlikka sakrashda 7,18 metr natija bilan Osiyo rekordini yangilab berdi. 2015 yilgi JCHda xitoylik sportchi 7,07 metr bilan rekord qo‘ygandi.

Aleksandr Svechnikov esa nayza otishda 71,01 metr natija qayd etib, jahon rekordini o‘rnatdi, deb xabar berdi Milliy paralimpiya qo‘mitasi matbuot xizmati.

London—2017 da 1050 sportchi 213 ta medal uchun kurash olib bordi.

O‘zbekiston delegasiyasi Toshkentga 26 iyul kuni ertalab — soat 8:25 da yetib keladi.