AQSHning Nyu-York shahrida o‘zbekistonlik muhojirlar ishtirokida «Mustaqillik kubogi» futbol musobaqasi o‘tkaziladi.

Musobaqa shu yilning 17 sentyabr sanasida start olishi rejalashtirilgan bo‘lib, o‘zbekistonlik muhojirlardan tashkil topgan futbol jamoalari Bruklinda jam bo‘ladi. Ikkinchi marta o‘tkazilayotgan «Mustaqillik kubogi» uchun arizalar 10 avgust sanasiga qadar qabul qilinadi.

«Mustaqillik kubogi»ning birinchisi 2016 yil bo‘lib o‘tgandi. Unda Nyu-York, Pensilvaniya, Nyu-Jersi, Merilend va poytaxt Vashington shaharlaridan jami 8 jamoa ishtirok etgan bo‘lib, g‘oliblik Nyu-Yorkning «Paxtakor» jamoasiga nasib qilgan.

AQSHda istiqomat qilayotgan o‘zbekistonliklar mazkur musobaqada ishtirok etishni istasa, +1 (718) 737-23-19 telefon raqamiga qo‘ng‘iroq qilishi mumkin.

Bruklinda tashkilotchilar ishtirokchi jamoalar uchun o‘zbekcha palov sayli va dasturxon yozishni ko‘zda tutgan. Shuningdek, futbolchilarning oila-a’zolari uchun ham ko‘ngilochar tadbirlar uyushtirish rejalashtirilgan.